«Үйэлээх мал». Күндүтүйэн иһэллэр

Ааптар: 
Бөлөххө киир:

«Үйэлээх мал» («Өбүгэм ситимэ») куонкуруска дьоммуттан-сэргэбиттэн хаалбыт күндүтүк саныыр малларым хаартыскаларын ыытабын.

Бэйэм сааһым 82 буолла. Көр, сааһыран истэх аайы, киһиэхэ дьонуттан хаалбыт мала-сала олус күндүтүйэн, кэрэтийэн иһэр буолар эбит.

Ийэбиттэн Парасковья Львовнаттан хаалбыт молуоһунньук. Түгэҕэр 1886 сыл диэн бэлиэлээх. Онтон иистэнэр массыына ийэм ийэтин киэнэ эбитэ үһү. Онон эмиэ сүүс сылтан быдан тахсыбыт. Бу массыынаны илдьэ сылдьабын. Билигин да тигэр.

Онтон нуучча дьааһыга аҕам Павел Иванович киэнэ. Аҕам Аҕа дойду уоттаах сэриитигэр сылдьыбыта. Дьааһык туруга билигин да үчүгэй. Малбын-салбын, таҥаспын укта сылдьабын.

Аны улахан хоппо дьааһыгы ампаарга туруорабын. Кэргэним Евдокия Дмитрьевна абаҕатын киэнэ эбитэ үһү. Эмиэ сүүс сылтан быдан тахсар. Кыһыҥҥы истээх таҥаһы угабыт, наһаа наадалаах мал. Хаартыскалары көрүҥ.

Иван Слепцов,

Таатта, Кыйы

Хаартыскалар И.П.Слепцов тиксэриилэрэ

+1
0
+1
0
+1
0
+1
0
+1
0
+1
0
+1
0