Үйэлээх мал

«Үйэлээх мал». Холбука, бэчээт уонна оҕуруо

Мас холбука солуоманан киэргэтиллибит. Хаппаҕар дьиэ иннэ ойууламмыт, үс улахан түннүктээх, онто үөһэ өттө киэргэтиилээх. Нуучча дьонун (XIX үйэ ортотун диэки) мас оҥоһуктарын үтүктэн оҥоһуллубуттар. Бу ийэм Ефремова Александра Семеновна (1928-2005 сс.) холбуката. Манна араас өҥнөөх, быһыылаах оҕуруолар кыра, улахан эмп бытыылкаларыгар кутуллан ууруллар буолаллара. Ийэм этэрбэс билэтин тигэрэ.

Маны сэргэ, эбэм Ефремова Анастасия Константиновна (1903-1982 сс.) иистэнэр малын уган илдьэ сылдьар маллаах иһитэ баар.

Олохтоох нэһилиэк сэбиэтин бэчээтин уура сылдьабыт. Таайым Кононов Семен Константинович (1911-1987 сс.) үөрэҕэ суох этэ. Араас куурустарга үөрэнэн ааҕар-суруйар буолбута. Сүүрбэ сааһыттан олохтоох сэбиэккэ үлэлэһэн, 1936 сылтан бэрэссэдээтэли солбуйааччы буолбут. 1938-1950 сс. бэрэссэдээтэллээн нэһилиэгин салайбыт. 1950-1954 сс. ССРС III Ыҥырыылаах Үрдүкү Сэбиэтин дьокутаатынан талыллан үлэлээбитэ. Бу бэчээккэ «ЯАССР Западно-Кангаласский район 3 Мальжегарск нассовет. ЯАССР Арҕаа- Хаҥалас оройуона 3 Малдьаҕар н/с” диэн латыынныы буукубаларынан хаһыллан суруллубут.

Алтан биэстээх харчы 1949 сыллаах. Бу харчы биһиги дьиэбитигэр мин өйдүөхпүттэн баар. Кэлин эмп курдук тутталлара, ис тэһэҕэс төрөөбүт кыһыл оҕолорго кииннэригэр тутан баайаллара, 2013 сылларга туттуллубута, ыаллар уларсар этилэр.

Аҕам Ефремов Иван Петрович (1923-2007) сэрии, үлэ бэтэрээнэ мунньан илдьэ сылдьыбыт харчылара бааллар. 1905 с. үс солкуобай, 1909 с. уон солкуобай, 1909 с. сүүрбэ биэс солкуобай, 1909 с. биир солкуобай, биэс солкуобай, 1919 с. сыллаах алта уон солкуобай харчылар. Хаартыскалары көрүҥ.

 

Галина Белых,

Хаҥалас, Чкалов.

Хаартыскалар Г.Белых тиксэриилэрэ

 

0
0
Telegram @edersaas20