Биһиги аҕабытынан эһэбит бииргэ төрөөбүт балта Решетникова Александра Ивановна диэн баара.
Кини иккитэ бэйэлэрин көрүнэр кыахтаах дьоҥҥо кэргэн тахса сылдьыбыт да, кэргэттэрэ иккиэн өлбүттэр. Уопсайа уон иккитэ оҕоломмут да, биир да оҕо хаалбатах. Кыраларыгар өлөн испиттэр. Ол иһин оҕо турбат ыала диэн, хас да оҕону хотон түннүгүнэн күрэппиттэр. Олох кырдьыбытын кэнниттэн, Чөркөөхтөн биир оҕонньор өлөөрү сытан “Кэлэ сырыттын” диэн илдьит ыыппыт. Ону: “Аны кэлэн мин оҕолорум баар да буоллахтарына, көрүллүбэтэх дьон ийэбит диэхтэрэ суоҕа”, — диэн бараахтаабатах. Ол саҕана манна биир ыалга хоно сыттаҕына, таһаараа ыаллара оҕонньор итирик киирэн Чөркөөххө кини о5ото баарын эппит. Сарсыныгар эдьиийбит ол киһи өйдөммүтүн көрөн тахсан ыйыппытын, “Итирэ-кутура сылдьан тугу саҥарбыппын өйдөөбөппүн” диэн мэлдьэһэн кэбиспит.
Эдьиийбит убайыттан, биһиги эһэбититтэн, балыс этэ. Биһиги эһэбит 1877 сыллаах төрүөх. Эһэбит түөрт оҕолоох огдообо хаалбыт. Ийэтэ өлөрүгэр төрөөн хаалбыт эһээхэй кыыһын кыайан көрбөт буолан, ыалга ииттэрэ биэрбит. Ол кэмҥэ балта убайыгар оҕолоро, кэргэнэ суох хаалан баран көһөн кэлбит. Бииргэ олорон биһиги аҕабыт ааҕы көрсүбүт. Онно кэлэригэр илдьэ кэлбит маллара биһиэхэ хаалбыттар.
Олортон кычымы, чорооннору, кыһыл көмүс биһилэҕи (кур курдук ойуута) хаартыскаҕа түһэрэн ыыттым. Ити маллар хас сыллаахтарын чуолкайын этэр кыаҕым суох. Эдьиийбит өлбүтэ 50-ча сыл буолла. Оччолорго оскуола оҕото буолан, ыйыппакка хаалбыппын. Олох былыргылар, эргэрбиттэр. Ыччат биллин, көрдүн диэн ыыттым. Хаартыскалары көрүҥ.
Антонина Стручкова,
Таатта, Чычымах.
Хаартыскалар А.Стручкова тиксэриилэрэ