» Үйэлээх мал» (» Өбүгэм ситимэ») куонкуруһу сэргээн, сэҥээрэн кыттарга быһаарынным.
Ииппит дьонум Роман Григорьевич, Мария Григорьевна Борисовтар Мэҥэ Хаҥалас улууһун Бүтэйдээх нэһилиэгин төрүт олохтоохторо этилэр. Кинилэртэн хаалбыт кэриэн айах чороонноохпун. 47 см. үрдүктээх, эргимтэтэ 22.5 см , айаҕа 18 см., атаҕын үрдүгэ10 см., атаҕын кэтитэ-8.3 см. Тоҕус томторҕо ойуулаах. Илии үлэтэ. Улахан хатыҥ мастан хаһан оҥоһуллубут. 19 үйэҕэ чочуллан тахсыбыт буолуон сөп. Улахан уус оҥорбут.
Ийэбиттэн хаалбыт суһуох киистэтин уура сылдьабын. Мин 5-6 саастаахпар баттахпар баайарын бу баардыы өйдүүбүн, сылаанньыйан саныыбын. Оччолорго, санаабар, ыйааһыннаах курдук буолара. Маннык киистэлэр В.Серошевскай » Якуты», Б.Ф.Неустроев- Мандар Уус » Саха ойуута- бичигэ» кинигэлэригэр 18-19 үйэлэргэ бааллара суруллар.
Полина Сосина,
Мэҥэ Хаҥалас, Моорук.
Хаартыскалар П.Сосина тиксэриилэрэ