Бу бытырыыстаах солко былаат мин хос эбэм Сивцева Варвара Иннокентьевна (1892 с.т.) бааммыт былаата. Кини Уус Алдан Баатаҕайыгар олорбут сэниэ ыал кыыһа.
Былаат соҕурууттан бэлэх буолан кэлбит буолуон сөп. Өҥө уларыйбатах, сырдык маҕан. Ыйааһыннах фабрика былаата.
Кытыйа, үс чороон, икки хамыйах. Кытыйа улахан хатыҥтан оҥоһуллубут. Улахан чороон биир атахтаах, орто уонна кыра чорооннор үс атахтаахтар. Эһэм Окоёмов Егор Александрович Уус Алдан Курбуһаҕар олорбута.
Ыскаап. Тоһоҕото суох. Мас ууһа оҥорбут ыскааба аҕабыттан хаалбыт мал. 2002 сыллаахха реставрациялаабытым.
Бу ыскаап остуолу кытта тэҥ набор, тоһоҕото суох, остуолу реставрациялаабытым, сирэйигэр сибэккилэр уруһуйдаммыттара. Итиэннэ бу аҕабыттан хаалбыт алтан иһит, дьонун иһиттэрэ. Маны сэргэ баахыла тимирэ. Үс харахтаах чугуун оҥоһук. 70 см уһуннаах, ыарахан ыйааһыннаах, суруга, бэчээтэ хомойуох иһин кыайан көстүбэт.
Итиэннэ ампаар күлүүһэ. 1972 сыллаахха Курбуһахтан, Окоём алааһыттан, ампаары кытта тэҥҥэ кэлсибит күлүүс. Билигин туттулла сылдьар. 18-19 үйэҕэ Нижегородскай губернияҕа Павловскай оройуонугар оҥоһуллубут. Өрөбөлүүссүйэ иннинэ оҥоһуллубут буолуон сөп.
Елена Окоемова,
Уус Алдан, Бороҕон.
Хаартыскалар Е.Окоемова тиксэриилэрэ