Керченскэй силбэһиигэ тутулла турар муостаҕа бэҕэһээ иккис аарканы туруордулар.Барыта этэҥҥэ бардаҕына, массыыналарга аналлаах муостаны быйыл ахсынньыга киллэриэхтэрэ. Бүгүҥҥү күҥҥэ үлэтэ 90 % кээрэтиллибит.
Бастакы аарканы туруорууга уопуттанан, тутааччылар иккиһи икки суукка иһинэн миэстэтин буллардылар. Былаан быһыытынан 72 чаас иһинэн оҥоруохтаахтарын 54 чааһынан бүтэрдилэр. 5 тыһ. тонна кэриҥэ ыйааһыннаах тимир аарканы 12 сүүнэ домкрат көмөтүнэн туруордулар.
Бу муостаны “үйэ тутуута” диэн мээнэҕэ эппэттэр. Массыыналарга аналлаах муоста уһуна 16,9 км, тимир суол киэнэ 18,1 км тэҥнэһэр.
Аарканы таҥыы ыытыллар кэмигэр суудуналар сырыыларын алтынньы 14 күнүн сарсыарда 6 чааска диэри боппуттар. Ол эрээри, таҥыы түмүктэнээтин кытта бастакы суудуна икки аарка анныларынан этэҥҥэ устан ааспыт.
“Тимир суол муостатын ааркатын туруорууга үөрүйэхтээх буолан, иккиһи этэҥҥэ оннун буллардыбыт. Икки суукка кэриҥэ үлэлээтибит”, – диэн “Строгазмонтаж” ХЭУо генеральнай дириэктэрин инфраструктураҕа бырайыактарга солбуйааччы Леонид Рыженькин үөрүүтүн үллэстибит.
Бу муоста Керченскэй уонна Таманскай арыылары холбуур. “Үйэ тутуутун” сыаната 227,92 млрд солк.
Үйэ тутуутун туһунан олохтоохтор санааларын ыйыталастыбыт. Онуоха:
Николай Алексеев, Дьокуускай олохтооҕo:
— Мин төһө даҕаны ыраах олорбутум иһин ити улуу муоста тутуута хайдах бара турарын истэ-билэ, көрө сылдьабын. Киэҥ Арассыыйа историятыгар көмүс буукубанан суруллар сүдү тутуу буолар. Бэҕэһээ иккис аарканы туруорбуттарын «күн экран» сонуннарыгар кэпсээбиттэрин долгуйа иһиттим, көрдүм. Бу улахан ситиһии. Арассыыйа модунун, кыахтааҕын туоһулуур.
Спиридон Борбуев, Үөһээ Бүлүү улууһун үөрэҕин управлениетын начаалынньыга:
— Ити муоста хаһан тутуллан бүтэрин биир бэйэм олус күүтэбин. Тоҕо диэтэххэ, үлэҕэ киирдэҕинэ, сөмөлүөт сыаната да чэпчиэ этэ. Оччоҕуна хоту сиргэ олорор дьон ити диэки айанныыллара элбиэҕэ. Бэйэм сынньана бардахпына массыына арендалаан сылдьарбын сөбүлүүбүн. Аан дойду таһымнаах массыына ыытар бырааптаахпын. Билигин сайдыылаах сирдэргэ «Каршеринг» диэн интэриниэт ситиминэн массыына арендалаһар өҥө күүскэ сайынна.
Аны туран, экэнэмиичэскэй суолтатын эттэххэ, фрукта, оҕуруот аһа Крым арыытыттан кэбэҕэстик кэлэр буолуоҕа, сыаната да чэпчиэ дии саныыбын. Итини тэҥэ, быйыл атырдьах ыйын 19 күнүгэр Москваттан норуоттар ассамблеятын салалтата Үөһээ Бүлүүгэ улахан тэрээһиҥҥэ кыттыбыта. Онно сүдү муоста тутуутун кэрэһэлиир «Россия — больше, чем страна!» диэн бырайыак Үөһээ Бүлүүттэн саҕаламмыта. Онон Үөһээ Бүлүүттэн анал дэлэгээссийэ ахсынньыга муостаны аһыыга кытта барыахтаах.