Бүгүн Бүтэйдээх орто оскуолатын 1970 с. бүтэрбит выпустар — 10 «а» уонна 10 «б» физмат кылаастар, үөрэммит кыһаларыгар махталларын бэлиэтигэр — сынньалаҥ ыскамыайкаларын оҥорон бэлэхтээтилэр.
edersaas.ru
Выпускниктар ааттарыттан дьоһуннаах бэлэҕи СӨ норуотун хаһаайыстыбатын үтүөлээх үлэһитэ, Бүтэйдээх нэһилиэгин, Мэҥэ Хаҥалас улууһун бочуоттаах гражданина Алексей Игнатьев туттарда.
50 сыл анараа өттүгэр бүтэрбит дьон үөрүүлээх уонна долгутуулаах тэрээһиннэригэр улуустааҕы үөрэх управлениетын салайааччыта Ирина Черкашина, нэһилиэк баһылыга Александр Слепцов, оскуола дьаһалтатыттан, үбүлүөйдээх кылаас салайааччыта Николай Семенов кэргэнэ, педагогическай үлэ бэтэрээнэ Матрёна Семенова кыттыыны ыллылар.
Кэрэхсэбиллээҕэ, бу үөрүүлээх күн оскуолаҕа саҥа ананан кэлбит оскуола дириэктэрэ Михаил Нестеров нэһилиэк олохтоохторун, оскуоланы кытта бастакы билсиһэр күнэ түбэстэ.
Үйэ аҥаардааҕыта бүтэрбит үбүлүөйдээх кылааһы 30 оҕо, «б» физмат кылааһы 12 оҕо бүтэрбиттэрэ (кылаас салайааччыта Тамара Сосина). Кинилэр бары уустук кэми аахсыбакка, тапталлаах оскуолаларыгар ис сүрэхтэриттэн үйэлээх бэлэҕи ууннулар.
«Үбүлүөйдээх кылааска оскуола, нэһилиэк махталын тиэрдэбит! Бары үчүгэйи баҕарабыт!» — диэн иһитиннэрдэ Бүтэйдээх нэһилиэгин пресс-кииниттэн олохтоох мусуой кыраайы үөрэтэр дириэктэрэ Константин Родионов.
Бүтэйдээх орто оскуолатыгар кылаастарынан оскуола ыскамыайкатын бэлэхтээһин үгэскэ кубулуйбут. Ийэ дойдуга бэриниилээх буолуу сылыгар үбүлүөйдээх выпустар бэртээхэй бэлэҕи оҥордулар.
Елена ПОТОЦКАЯ, «Саха сирэ» хаһыат, edersaas.ru
Хаартыска: Константин Родионов тиксэриитэ
—