Аҕа дойду уоттаах сэриитигэр Улуу Кыайыы 75 сылынан Арассыыйаҕа Өйдөбүнньүк уонна Албан аат сыла биллэриллибитэ.
Бу бэлиэ сыл чэрчитинэн, А.Е.Кулаковскай аатынан норуоттар доҕордоһууларын дьиэтин Хотугу төрүт олохтоох аҕыйах ахсааннаах норуоттар үгэс буолбут култуураларын салаата саллааттар хорсун быһыыларын үйэтитэргэ, норуот килбиэннээх уонна дьоруойдуу хорсун быһыытын туһунан өйдөбүлү харыстыырга, эдэр ыччаты дойдуга бэриниилээх буолууга иитэргэ тиһиктээх үлэни тэрийэр.
Ол чэрчитинэн, «Потомки о героях Бессмортного полка северян» диэн онлайн-аахсыйа тэрийдэ. Манна Аҕа дойду уоттаах сэриитигэр Улуу Кыайыыны уһансыбыт, ити ыар сылларга үлэ фронугар сыраларын-сылбаларын бараабыт эһээлэрин, эбээлэрин, аҕаларын, ийэлэрин, убайдарын хаартыскаларын кинилэр удьуор ыччаттара көрдөрдүлэр, ис сүрэхтэриттэн долгуйан кэпсээтилэр, бар дьон билиитигэр-көрүүтүгэр таһаардылар.
Аахсыйа кыттыылаахтара дьоннорун туһунан суруйууларыгар киһини улаханнык долгутар түгэннэри аҕыннылар, болҕомтону тардар чахчылары аҕаллылар, дьоннорун-сэргэлэрин олохторун кэпсээтилэр, кэнчээри ыччаттарын сырдаттылар. Оттон Кыайыы параадыгар «Герои Бессмертного полка северян» ролик тахсыаҕа, онно 120-тэн тахса бэтэрээн көстүөҕэ.
«ПОБЕДЫ ПРАЗДНИЧНЫЙ САЛЮТ» бэстибээлгэ куоластааһын салҕанар.
Куоластааһын, иһитиннэрбиттэринэн, ыам ыйын 30 күнүгэр диэрибарар. Инстаграмынан @kmns_ddn_kulakovskogo киирэн «Победы праздничный салют» уус-уран художественнай көрүү эрэгийиэннээҕи интэриниэт бэстибээлин көрөҕүт, куйаар ситиминэн куоласкытын биэрэҕит.
Манна Дьокуускайтан, Бурятияттан, Красноярскай кыраайтан, Магадан уобалаһыттан, Москваттан ырыаны толорооччулартан уонна кэлэктииптэртэн барыта 149 сайаапка киирбит.
Бэстибээлгэ кыттааччылар Аҕа дойду уоттаах сэриитин, хорсун-хоодуот дьоруойдар, күн күбэй, ытык ийэлэр, Улуу Кыайыы туһунан ырыалары ыллаан, хоһооннору ааҕан, ону видеоҕа устан ыыппыттар. Хотугу төрүт олохтоох аҕыйах ахсааннаах норуоттар «День Победы», «Катюша», «Журавли» курдук биллэр-көстөр ырыалары төрөөбүт тылларынан толорбуттара кэрэхсэбиллээх диэн суруйаллар.