СӨ Култуура уонна устуоруйа эбийиэктэрин харыстыыр департамены салайар Николай Афанасьевич Макаров Ил Дархан А.С.Николаев Анал этиитигэр санаатын үллэһиннэ:
—Ил Дархан Айсен Сергеевич Николаев Саха Өрөспүүбүлүкэтин Судаарыстыбаннай мунньаҕар (Ил Түмэҥҥэ) оҥорбут Анал этиитигэр Саха сиригэр баар история уонна култуура пааматынньыктарыттан саамай улаханнарга киирэр Дьокуускайдааҕы реальнай училищены уонна Эр дьон прогимназиятын өрөмүөнүн кэлэр сылга саҕалааҥ диэн өрөспүүбүлүкэ Бырабыыталыстыбатыгар сорудах биэрбитэ.
Бу икки эбийиэги чөлүгэр түһэриэххэ диэн этиилэр турбуттара олус ыраатта, быһа холоон бу үйэ саҕаланыаҕыттан. Ону өйөөн Айсен Сергеевич быһаарыныы ылан Бырабыытылыстыбаҕа сорудах биэриитэ чахчы биһиги устуоруйабытын үөрэтиигэ уонна өйдөбүнньүктэри чөлүгэр түһэриигэ улахан хардыы буолар. Биир өттүнэн биһиэхэ, өйдөбүнньүктэри харыстааһынан дьарыктанар дьоҥҥо, улахан эппиэтинэс сүктэрилиннэ.
Реальнай училищеҕа билиҥҥитэ реставрация үлэтин ыытыы бырайыага түмүктэнэн эрэр, салгыы ханнык судаарыстыбаннай бырагыраама көмөтүнэн ону олоххо киллэрэрбитин быһаарыахтаахпыт. Онтон Эр дьон прогимназиятын дьиэтин туһунан этэр буоллахха, тэхиньиичэскэй сорудаҕа бүттэ. Ол докумуону Судаарыстыбаннай сакаастары дьаһайар тэрилтэҕэ ыытан реставрацияланар бырайыагын оҥорууга үп көрдүөхпүт. Ол оҥоһуллубутун кэнниттиттэн эмиэ үбүн быһаарыы үлэтэ саҕаланыаҕа.
Биһиги баҕа санаабыт — Өрөспүүбүлүкэбит 100 сылын туолуутугар ити этиллибит икки өйдөбүнньүгү чөлүгэр түһэрдэрбит диэн.