2018 сыл тохсунньутугар Красноярскай куоракка буолар Иван Ярыгин кэриэһигэр Гран-при турнирга кыттар быраап бастатан туран 2016 сыллааҕы Олимпиада призердарыгар, быйылгы Европа, аан дойду чөмпүйэнээттэрин кыттыылаахтарыгар бэриллиэҕэ. Бу туһунан суруналыыстарга Арассыыйа сүүмэрдэммит хамаандатын кылаабынай тириэньэрэ Дзамболат Тедеев иһитиннэрдэ.
Истэ-билэ сылдьаргыт курдук, Саҥа дьылтан Тустуу холбоһуктаах эйгэтэ (UWW) бөҕөстөргө рейтинг саҥа тиһигин олохтуур. Онно олоҕуран аан дойду, континент чөмпүйэнээттэрин уонна чуолаан көҥүл тустууга “Иван Ярыгин” (Арассыыйа, Красноярскай), «Вахтанг Балавадзе» (Грузия, Тбилиси), «Александр Медведь» (Беларуссия, Минскэй) уонна Соҕуруу Африкаҕа ыытыллар Гран-при турнирдар түмүктэринэн тустууктар рейтиннэрэ быһаарыллыаҕа.
Санатар буоллахха, 2016 сыллааҕы Олимпийскай оонньуулар кыайыылаахтарынан Сослан Рамонов (65 кг диэри) уонна Абдулрашид Садулаев (86 кг), үрүҥ көмүс призерунан Аниуар Гедуев (74 кг) буолбуттара. Оттон аан дойду быйылгы чөмпүйэнээтигэр Заур Угуев (57 кг), Гаджимурад Рашидов (61 кг), Алан Гогаев (65 кг), Магомедхабиб Кадимагомедов (70 кг), Хетик Цаболов (74 кг), Владислав Валиев (86 кг), Абдулрашид Садулаев (97 кг), Анзор Хизриев (125 кг) кыттыбыттара. Европа чөмпүйэнээтигэр дойду чиэһин Заур Угуев (57 кг), Ахмед Чакаев (61 кг), Ильяс Бекбулатов (65 кг), Исраил Касумов (70 кг), Ахмед Гаджимагомедов (74 кг), Даурен Куруглиев (86 кг), Анзор Болтукаев (97 кг), Алан Хугаев (125 кг) көмүскээбиттэрэ.
Итилэри сэргэ сэтинньигэ Владикавказка ыытыллыбыт “Аланы” күрэхтэһии кыайыылаахтара: Азамат Тускаев (57 кг), Исмаил Мусукаев (61 кг), Ахмед Чакаев (65 кг), Магомед Курбаналиев (70 кг), Алан Засеев (74 кг), Артур Найфонов (86 кг), Владислав Байцаев (97 кг) уонна Билял Махов (125 кг) Красноярскай түһүлгэтигэр тустар быраабы ылыахтара.
Эмиэ тохсунньуга буолар Дмитрий Миндиашвили аатынан Тустуу академиятын бирииһигэр күрэхтэһии кыайыылаахтара ааттаах-суолга турнирга кыттар быраабы ылыахтара диэн буолар.
Онон, Дзамболат Тедеев Иван Ярыгин турнирыгар хас ыйааһын аайы Арассыыйаттан биэстии бөҕөс тустуоҕун туһунан эппитин болҕомтоҕо ыллахха, саха бөҕөстөрүттэн билиҥҥитэ Виктор Рассадин уонна Дмитрий Аксенов эрэ кыттыахтарын сөп. Санатар буоллахха, Виктор Рассадин — 61 киилэлээхтэргэ Арассыыйа үрүҥ көмүс призера, Иван Ярыгин Гран-при турнирын боруонса призера, 65 киилэҕэ диэри ыйааһыҥҥа Нефтеюганскайга ыытыллыбыт норуоттар икки ардыларынааҕы турнир кыайыылааҕа, Европа нацияларын Кубогын хаһаайына. Оттон Дмитрий Аксенов дойду боруонса призерунан буолар.
Тохсунньу 26-28 күннэригэр буолар Красноярскай түһүлгэтигэр саха тустууга оскуолатын иитиллээччилэрэ — “Иван Ярыгин-2016” кыайыылааҕа Ньургун Скрябин уонна Александр Медведь турнирын чөмпүйүөнэ Андрей Бекренев Белоруссия сүүмэрдэммит хамаандатыттан тустуохтарын сөп.
Роман Попов, “Саха сирэ” хаһыат