Биллэрин курдук, тохсунньу 27-29 күннэригэр Красноярскайга көҥүл тустууга икки төгүллээх олимпийскай чөмпүйүөн Иван Ярыгин аатынан норуоттар икки ардыларынааҕы Гран-при турнир ыытыллар. Балаһыанньа быһыытынан бу түһүлгэҕэ Россия хамаандатыттан бастыҥнар эрэ кытталлара былааннанар. Петр Павлов, edersaas.ru
Ол курдук, Россия спортивнай тустууга федерациятын салалтатын ирдэбилин быһыытынан, Иван Ярыгин аатынан Гран-при турнирга кыттар инниттэн бөҕөстөр 2016 сыллааҕы көрдөрүүлэригэр маннык ирдэбил олохтонно:
-Россия чөмпүйэнээтигэр 1-5 миэстэлэри ылбыттар.
-“Иван Ярыгин” Гран-при турнирга 1-3 миэстэлэри ылбыттар.
-Россия Кубогар 1-2 миэстэлэри ылбыттар.
-Россия абсолютнай чөмпүйэнээтигэр 1-2 миэстэлэри ылбыттар.
-Россия эдэрдэргэ күрэхтэһиитигэр 1-2 миэстэлэри ылбыттар.
-Аан дойду уонна Европа эдэрдэргэ күрэхтэһиилэригэр 1-2 миэстэлэри ылбыттар.
-Аан дойду Кубогын кыттыылаахтара.
-Аан дойду тустууга федерациятын официальнай турнирдарыгар бастаабыттар.
-Д.Миндиашвили аатынан Красноярскайдааҕы Тустуу академиятын бирииһигэр күрэхтэһии кыайыылаахтара.
-2013-2016 сс. аан дойду уонна Европа чөмпүйэнээттэрин кыайыылаахтара уонна призердара.
Билигин, турнир иннинэ, “Саха сириттэн Красноярскайга хас киһи кыттарый? Кимнээх тусталларый?” — диэн ыйытыы элбээтэ.
Онуоха олохтоммут ирдэбил быһыытынан ырытан көрдөххө, Дьокуускайга ыытыллыбыт Россия чөмпүйүөнээтин кыайыылаахтара Виктор Лебедев (57 кг), Егор Пономарев (61 кг), үрүҥ көмүс призер Виктор Рассадин (61 кг), боруонса призердар Арыйаан Тютрин (57 кг), Ньургун Скрябин (61 кг), Вячеслав Ефремов (61 кг), Евгений Коломиец (97 кг) уонна бэһис буолбут Виктор Степанов (65 кг) – Иван Ярыгин турнирыгар кыттар быраабы ыллылар.
Былырыыҥҥы “Иван Ярыгин” турнирыгар бастаабыт Ньургун Скрябин (61 кг) уонна үһүстээбит Виктор Лебедев (61 кг), АХШ-ка ыытыллыбыт Аан дойду кубогар хамаанданан иккис миэстэлэммит Виктор Рассадин (61 кг) эмиэ ирдэбилгэ сөп түбэһэллэр.
Аны, Тустуу аан дойду федерациятын (UWW) былаанын быһыытынан ыытыллыбыт норуоттар икки ардыларынааҕы турнирдар кыайыылаахтара диир буоллахха, биһигиттэн, улуу тренер Д.П.Коркин аатынан түһүлгэ кыайыылаахтара Ньургун Александров (57 кг) уонна Егор Пономарев (61 кг) итиэннэ Казахстаҥҥа ыытыллыбыт Д.Кунаев кэриэһигэр күрэхтэһиигэ бастаабыт Константин Власов (65 кг) – кыттар бырааптаахтар. Өссө манна, Индиятааҕы норуоттар икки ардыларынааҕы турнир кыайыылааҕа Тимур Николаев (70 кг) киирэн биэриэн сөп этэ да, ити турнир UWW сыллааҕы календарнай былааныгар суоҕа.
Дьэ онон, ааҕан көрдөххө, Саха сирин тустууга кыһатын иитиллээччилэриттэн “Иван Ярыгин” аатынан норуоттар икки ардыларынааҕы турнирга 10 бөҕөспүт кыттыахтаах. Ол эрээри, кэнники сылларга тумус туттар бөҕөспүт Виктор Лебедев Красноярскайдааҕы турниры көтүтэр буолла. Балаһыанньа быһыытынан, кинини киминэн даҕаны солбуйар көҥүллэммэт.
Бу испииһэккэ өссө, тохсунньу 14-15 күннэригэр Красноярскайга, Д.Миндиашвили аатынан Тустуу академиятын бирииһигэр ситиһиилээхтик кыттыбыт бөҕөстөрбүт киирэн биэриэхтэрин сөп. Ылан көрдөххө, Эдуард Григорьев, Николай Охлопков, Дьулустан Булатов, Тимур Николаев, Герман Устинов курдук күүстээх бөҕөстөрбүт билиҥҥитэ Ярыгин турнирыгар киирэр бырааптара суох сылдьар.
Петр ПАВЛОВ, edersaas.ru