Иван Ярыгин түһүлгэтиттэн бөҕөстөрбүт икки мэтээллээх эргилиннилэр

Ааптар: 
Бөлөххө киир:

Ааспыт өрөбүлгэ Красноярскайга тустууну сэҥээрээччилэр өр кэтэспит күрэхтэһиилэрэ — Иван Ярыгин кэриэһигэр көҥүл тустууга ХХХ норуоттар икки ардыларынааҕы турнир түмүктэннэ. Бу эппиэттээх күрэхтэһиигэ, истэ-билэ сылдьаргыт курдук, саха тустууга оскуолатын түөрт иитиллээччитэ – Арыйаан Тютрин, Семен Владимиров, Эдуард Григорьев, Николай Охлопков туһуннулар.


Урукку сылларга тэҥнээтэххэ, уолаттарбыт куһаҕана суох көрдөрүүлэннилэр — биир үрүҥ көмүс, биир боруонса мэтээли ылары ситистилэр. Ол курдук, 61 киилэлээхтэргэ күрэстэспит Эдуард Григорьев – үһүс буолла, оттон былырыыҥҥыттан Румыния былааҕынан тустар Николай Охлопковпыт эмиэ бу ыйааһыҥҥа иккис миэстэҕэ таҕыста.

Хомойуох иһин, Арыйаан Тютрин (57 кг) уонна Семен Владимиров (61 кг) турнир сүрүн сеткатыгар киирэр иһин күөн көрсүһүүлэргэ хоттортоон, туораатылар. Арыйаан Европа чөмпүйүөнүгэр Амирхан Гуважаковка (Кабардино-Балкария) – 6:2, оттон Семен Владимиров Арассыыйа чөмпүйүөнүгэр Магомедрасул Идрисовка (Дагестан) 5:1 ахсаанынан сабырыйтардылар.

Оттон тахсыылаахтык тустубут Эдуард Григорьев уонна Николай Охлопков финал аҥарыгар бэйэ-бэйэлэрин кытта күөн көрүстүлэр. Бу иннинээҕи барыллаан хапсыһыыларга Эдуард Григорьев бастаан Тыва тустуугун Майдыр Донгагы, салгыы Кубаттан сылдьар Алейнер Эрнандеһы үрүҥ харахтарын өрө көрдөрбөтө, иккиэннэрин 10:0 ахсаанынан сабырыйда. Үһүс хапсыһыытыгар АХШ бөҕөһүн Джо Колоны эмиэ илиилээх-атахтаах оҥорбото – 10:1. Оттон Николай Охлопков сытыы бырахсыылардаах тустууну көрдөрдө, утуу-субуу Мират Ходженепесовы (Туркменистан) – 10:0, Чинзориг Цэрмааны (Монголия) 12:2 ахсаанынан хотуталаата. Финалга тахсар иһин хапсыһыыга Охлопков Григорьевы баһыйа тутта – 12:5. Салгыы кыайыылааҕы быһаарар түмүк киирсиигэ 23-гэр саастаахтарга аан дойду чөмпүйүөнэ Магомедрасул Идрисовы (Дагестан) кытта туһунна. Манна Николай Арассыыйа 2018 сыллааҕы чөмпүйүөнүн утары тугу да кыайан оҥорбото, 0:7 ахсаанынан сабырыйтарда.

Эдуард Григорьев боруонса мэтээл иһин киирсиигэ хара ааныттан кимиилээхтик тустан утарылаһааччытын — монгол Чанзориг Цэрмааны баһыйа тутта, 5:0 ахсаанынан хотто.

Иван Ярыгин кэриэһигэр көҥүл тустууга ХХХ норуоттар икки ардыларынааҕы турнир эр дьоҥҥо түмүктэрэ

Тохсунньу 24-27 күннэрэ. Красноярскай

57 кг (12 кыттааччы)
1. Муслим Садулаев (Арассыыйа)
2. Абасгаджи Магомедов (Арассыыйа)
3. Насанбуян Нармандах (Монголия) 3. Томас Гилман (АХШ)
61 кг (13 кыттааччы)
1. Магомедрасул Идрисов (Арассыыйа)
2. Николай Охлопков (Румыния)
3. Рамазан Ферзалиев 3. Эдуард Григорьев (иккиэн – Арассыыйаттан)
65 кг (12 кыттааччы)
1. Ахмед Чакаев (Арассыыйа)

2.Начын Куулар (Арассыыйа)
3. Гаджимурад Рашидов (Арассыыйа) 3. Батчулуун Батмагнай (Монголия)

70 кг (12 кыттааччы)

1. Магомедрасул Газимагомедов (Арассыыйа)
2. Мандахнаран Ганзориг (Монголия)
3. Бямбадорж Энхбаяр (Монголия) 3. Разамбек Жамалов (Арассыыйа)
74 кг (13 кыттааччы)
1. Заурбек Сидаков (Арассыыйа)
2. Якуп Гор (Турция)
3. Азамат Нуриков (Белоруссия) 3. Магомед Курбаналиев (Арассыыйа)
79 кг (6 кыттааччы)
1. Ахмед Гаджимагомедов (Арассыыйа)
2. Магомед Рамазанов (Арассыыйа)
3. Алекс Дерингер (АХШ)
86 кг (13 кыттааччы)
1. Даурен Куруглиев (Арассыыйа)
2. Фатих Эрдин (Турция)
3. Уйтумэн Оргодол (Монголия) 3. Владислав Валиев (Арассыыйа)
92 кг (5 кыттааччы)
1. Магомед Курбанов (Арассыыйа)
2. Батырбек Цакулов (Арассыыйа)
3. Баасанцогт Элзисайхан (Монголия)
97 кг (11 кыттааччы)
1. Шамиль Мусаев (Арассыыйа)
2. Александр Гуштын (Белоруссия)
3. Баки Сахин (Турция) 3. Игорь Овсянников (Арассыыйа)
125 кг (6 кыттааччы)
1. Анзор Хизриев (Арассыыйа)
2. Таха Акгюль (Турция)
3. Зелимхан Хизриев (Арассыыйа)

Роман ПОПОВ, «Саха сирэ» хаһыат, edersaas.ru

Хаартыска интэриниэттэн ылылынна

+1
0
+1
0
+1
0
+1
0
+1
0
+1
0
+1
0