«Иван Ярыгин-2020»: Тустууктарбыт кыттыыларын хайдах сыаналыахха сөбүй?

Красноярскайга ыытылла турар Иван Ярыгин аатынан көҥүл тустууга норуоттар икки ардыларынааҕы турнирга бэйэбит уолаттарбыт хайдах кытта сылдьалларын билиһиннэриини салгыыбыт. Бэҕэһээ, биһиги бөҕөстөрбүтүттэн маҥнай 65 киилэҕэ көбүөргэ Айсен Потапов уонна Виктор Рассадин таҕыстылар. Хомойуох иһин, уолаттарбыт табыллыбатылар. Оттон 57 киилэҕэ турнир биир боруонса мэтээлин ким ыларын быһаарсыыга икки уолбут тахсан туһуннулар. Ол туһунан саас-сааһынан кылгастык иһитиннэрдэххэ маннык.

Айсен Потапов (65 кг) монгол Тумур Очир-Тулгаҕа тулуспата. Хапсыһыы болдьоҕун иннинэ очукуонан ыраастык (0:10) хоттордо. Оттон Виктор Рассадин Ислам Дудаевка (Россия, Чечня) 4:12 ахсаанынан баһыйтарда. Салгыы күрэхтэһиигэ Тулга да, Дудаев даҕаны хоттороннор, биһиги уолаттарбыт бу түһүлгэҕэ биирдии эрэ эргиир тустан хааллылар.

Оттон иннинээҕи күн түмүгүнэн 57 киилэҕэ “уоскутар” бөлөххө киирбит соҕотох бөҕөспүт Петр Константинов сүрдээх тыҥааһыннаах хапсыһыыга Азия чемпионатын призера буола сылдьыбыт монгол баатыра Занданбуд Занабазары 10:7 ахсаанынан хотон, боруонса мэтээл иһин бэйэтин киһитэ Арыйаан Тютринныын киирсэр кыахтанна.

Уолаттарбыт тустууларын иннинэ, спорду сэҥээрээччилэр икки ардыларыгар араас санаалар бааллара. “Эдэр уол биэриэхтээх”, “Арыйааҥҥа суолу аһан биэриэхтээх” эҥин диэн курдук. Ол да буоллар, Тютриннаах Константинов мин көрдөхпүнэ, хайдах баалларынан кииристилэр. Ханнык даҕаны кэпсэтии суох. Уопут баһыйда диэххэ сөп, Арыйаан Тютрин 7:2 ахсаанынан кыайа тутта. Биир түгэҥҥэ Петр өссө үөһэттэн быраҕан түһэрэн, кутталлаах балаһыанньаҕа тута сырытта.

Уопсайынан, Петр Константинов бу турнирга үчүгэйдик туһунна дии саныыбын. Итиэннэ тустуу специалистарын харахтарын далыгар киирэн, урукку балаһыанньанан эттэххэ, Россия сүүмэрдэммит хамаандатын састаабыгар киирэр кыахтанна.

Бүгүн, тохсунньу 25 күнүгэр субуотаҕа хаалбыт түөрт ыйааһыҥҥа (74, 86, 92, 97 кг) тустуулар саҕаланаллар. Хомойуох иһин, эрдэ иһитиннэриллибитин быһыытынан, турнирга кыттыахтаах уолаттарбыт Ньургун Сергин эчэйии ылан, оттон Максим Толмачев ыалдьан хаалан, кыттыбат буолбуттар. Онон ити ыйааһыннарга биһигиттэн ким даҕаны суох. Турнир түмүгүнэн биир боруонса мэтээллэннибит. Маны хайдах сыаналыахха сөбүй? Үөрүөххэ дуу, хомойуохха дуу?

Бу суруйуу – буолбуту иһитиннэрии. Сотору турнир түмүгүнэн бэйэм санаабын бу сайтка кэтэһиҥ.

Түмүк курдук эттэххэ, быйылгы Ярыгин турнирыгар уон биир тустуукпут кытынна. Кинилэртэн Арыйаан Тютрин үһүс, Петр Константинов бэһис буоллулар. Уоннааҕылар: Егор Потапов, Алексей Копылов, Петр Копылов (57 кг), Петр Павлов, Ньургун Александров (61 кг), Айсен Потапов, Виктор Рассадин (65 кг), Револий Самсонов (70 кг) бары – биирдии, оттон Георгий Окороков (57 кг) – икки эргиир эрэ туһуннулар.

Онон, хамаанда тренердэрэ уонна специалистар уолаттарбыт кыттыыларын үчүгэйдик ырыталлара, бу кыттыыга сөптөөх сыана биэрэллэрэ, илэ бодолорун тардынан, бэйэлэрин үлэлэригэр уларытыылары киллэрэллэрэ күүтүллэр.

Петр ПАВЛОВ.

Евгения ШИХАЛЕЕВА (Красноярскай) хаартыскаҕа түһэриитэ.

dzulurgan.ru саайтан.