Иван Егорович Слепцов, Хаҥалас улууһун Нөмүгү нэһилиэгин олохтооҕо, тыа хаһаайыстыбатын бэтэрээнэ, Саха Өрөспүүбүлүкэтин тыатын хаһаайыстыбатын Бочуоттаах үлэһитэ:
edersaas.ru
— Холкуостаах ыал оҕото буоламмын, мин тыа хаһаайыстыбатын үлэтигэр-хамнаһыгар кыра эрдэхпиттэн эриллибитим, сааһым тухары бастаан сопхуоска, онтон агрофирмаҕа үлэлээбитим, аймахтарым эмиэ манна үлэлээбиттэрэ. Билигин оҕолорбут, сиэннэрбит үлэлии-хамсыы сылдьаллар. Онон, биһиги аҕа ууһа тыа хаһаайыстыбатын эйгэтигэр барыта холбоон 632 сыл үлэлээн-хамсаан кэллибит. Инникитин өссө даҕаны үлэлиэхпит турдаҕа.
Халандаарга балачча элбэх “кыһыл” күн баар эрээри, тыа хаһаайыстыбатын үлэһиттэригэр анаммыт бырааһынньык бэрт кэмчи. Ил Дархан Айсен Николаев ону таба өйдөөн, саха төрүт үгэһин сөргүтэр, боростуой үлэ дьонун өрө тутар уонна салааҕа ыччаты тардар сыаллаах-соруктаах ыам ыйын 22 күнүн, Ньукуолун күнүн – Сайылык күнүнэн биллэрбитэ саамай сөптөөх. Бу дьаһалы сэргэ Айсен Сергеевич тыа хаһаайыстыбатын сайдыытын стратегиятын туһунан ыйааҕы таһаарбыта. Дьэ бу дьоһун докумуонунан сирдэтэн, төрүт дьарыкпытын, хас биирдии салаанан сайыннарарга, тыа хаһаайыстыбатын бородууксуйатын оҥоһуутун үрдэтэр туһугар бары күүспүтүн-күдэхпитин, билиибитин-көрүүбүтүн, сатабылбытын ууран үлэлиэхтээхпит. Оччотугар эрэ тыа сиригэр үлэ миэстэтэ тахсан иһиэҕэ, ыччаттарбыт дойдуларыгар олохсуйан, саҥа технологиянан сэбилэнэн, агрофирмалары, кэпэрэтииптэри сайыннарыахтара, ол түмүгэр тыа сирин олоҕо-дьаһаҕа туруктаах буолуоҕа.
Раиса Сибирякова, «Саха сирэ» хаһыат, edersaas.ru