«АЛРОСА» акцияларын приватизациялыыр туһунан олунньу 2 күнүгэр РФ бырабыыталыстыбатын былаана бигэргэммитэ. Ил Түмэн дьокутаата, Өрөспүүбүлүкэтээҕи лицей дириэктэрэ Иван Шамаев «АЛРОСА» биһиги туспутугар үлэлиирин ситиһэ сатыахтаахпытын этэр.
Аграфена Кузьмина, «Саха сирэ» хаһыат, www.edersaas.ru
“2001 с. саҕалаан хампаанньа судаарыстыба хонтуруолугар сылдьарын туһугар охсуһабыт. Билигин биһиги блокируйдуур акцияларбытын, ол эбэтэр 25 % +1 акцияны, эрэ тутан хааллыбыт. Салгыы ханна да хамсыыр кыахпыт суох. Бу маны ыстахпытына, хампаанньабытын сүтэриэхпитин сөп”, — диэн бэлиэтиир Иван Иванович.
Оттон улуустар акцияларын туһунан: “Итини сэргэ, 8 % улуустарга баар акциялаахпыт. Бу балары атыыга таһаардахпытына, аны дивидеммитин сүтэрэбит”, — диэн этэр.
Ол иһин бу баар акцияларбытын тутан хааларбыт ордугун бэлиэтиир.
— Саха сирин олохтооҕо, Ил Түмэн дьокутаата буоларым быһыытынан, РФ бырабыыталыстыбата Саха сирин акциятын тыыппакка эрэ, 8 % атыыга таһаарыан сөп дии саныыбын. Ити 33 % аҕыһы көҕүрэттэхпитинэ 25 % + 1 акцията (блокируйдуур) хаалар.
Ыспыраапка: Олунньу 2 күнүгэр РФ бырабыыталыстыбата Россия баайын-дуолун 2017-2019 сс. приватизациялыыр былаанын бигэргэппитэ. Онно «АЛРОСА» хампаанньа акцияларыттан 8 % приватизацияҕа ыытыллыахтааҕа, ол иһигэр Россия илдьэ сылдьар судаарыстыбаннай бакыата 29 % + 1 диэри кыччыахтааҕа, Саха сирин уонна муниципальнай тэриллиилэр өлүүлэригэр эмиэ көннөрүү барыахтааҕа ыйыллыбыта.
«АЛРОСА» хампаанньа 2013 сыллаахха атыылаабыт акцияларыттан Саха сирэ 18 млрд солк. кэриҥэ харчыны киллэрбитэ. Бу харчы хаарбах дьиэттэн дьону көһөрүү бырагырааматыгар, социальнай эбийиэктэри тутууга, тыа сирин гаастааһыҥҥа туһуламмыта. 2013 сылтан саҕалаан өрөспүүбүлүкэбитигэр элбэх тутуу ыытыллыбытын этэр тоҕоостоох. Ол курдук, оскуолалары ыллахха, Хаҥалас Покровскайыгар, Амма Алтаныгар, Чурапчы Сылаҥар, Ньурба Күндээдэтигэр, Кэбээйи Сииттэтигэр, Батамайыгар, Аллараа Халыма Черскэйигэр, Өймөкөөн Томторугар, Муома Хонуутугар, Өрөспүүбүлүкэтээҕи лицей, Мүрүтээҕи уоланнар гимназияларыгар, о.д.а. оскуола тутуутугар барбыта. “РИК+” тэрилтэ бэлиэтииринэн, 20 оскуола былааннаммытыттан билигин 14 олоххо киирэн турар. Быйыл Муомаҕа, Уус Маайаҕа, Алдаҥҥа, Уус Алдаҥҥа оскуолалар тутуллуохтаахтар.
Аграфена Кузьмина, «Саха сирэ» хаһыат, www.edersaas.ru