Иван Попов: Нам улууһун олохтоохторун аатыттан Өрөспүүбүлүкэ күнүнэн эҕэрдэлиибин
![](https://edersaas.ru/wp-content/uploads/2020/04/nam.jpg)
Иван ПОПОВ, «Нам улууһа» МТ дьокутааттарын улуустааҕы Сэбиэтин салайааччыта:
– Сахабыт сирин бары олохтоохторун Өрөспүүбүлүкэбит төрөөбүт күнүнэн уһулуччулаах судаарыстыбаннай бэлитиичэскэй диэйэтэл Максим Аммосов, бөдөҥ судаарыстыбаннай партийнай-сэбиэскэй салайааччы Илья Винокуров биир дойдулаахтарын, Нам улууһун дьонун-сэргэтин аатыттан итиитик-истиҥник эҕэрдэлиибин!
Эһиил (2021 с.) Илья Винокуров төрөөбүтэ 125, икки сылынан (2022 с.) Максим Аммосов – 125, Саха сирин автономията төрүттэммитэ 100 бэлиэ суолталаах үбүлүөйдээх сылларын бэлиэтиэхпит. Бу буолаары турар улахан суолталаах тэрээһиннэргэ бэлэмнэнэн Ил Дархан Айсен Николаев Нам улууһугар тахса сылдьыытын түмүгүнэн кэккэ дьаһаллар ылыллыбыттара. Өрөспүүбүлүкэтээҕи хамыыһыйа тэриллэн, былаан бигэргэтиллэн, тустаах үлэ-хамнас бара турар. Ол курдук, үбүлүөйдээх тэрээһиннэри көрсө судаарыстыбаннай диэйэтэл Максим Аммосов төрөөбүт нэһилиэгэр Хатырыкка аспаал суол оҥоһуллуохтаах. 1991 с. тутуллубут 156 үөрэнээччилээх Максим Аммосов аатын сүгэр үс мэндиэмэннээх оскуолаҕа хапытаалынай өрөмүөн ыытыллыахтаах. Ону тэҥэ, хас да хайысхалаах култуура-спорт эбийиэгэ тутуллан үлэҕэ киириэхтээх. Бу былаан барыта ситэн, кэмигэр оҥоһуллан, суолталаах үбүлүөйдэри үрдүк таһымнаахтык бэлиэтиэхпит.
Үгэс быһыытынан сыл аайы Нам улууһун Хатырык нэһилиэгэр Судаарыстыбаннас түмэлигэр муус устар 27 күнүгэр – Саха сирин судаарыстыбаннаһын күнүгэр, балаҕан ыйын 27 күнүгэр – Суверенитет күнүгэр өрөспүүбүлүкэ салалтата Саха сирэ сайдыы суолун тобулар, соруктарын түстүүр, саҕахтарын торумнуур мунньахтары ыытар.
98 сыллааҕыта биир дойдулаахтарбыт М.К. Аммосов, П.А. Ойуунускай, И.С. Барахов, Саха сирин автономиятын тэрийбиттэрэ. Биһиги бу чулуу дьоммут ааттарын үйэтитэн, кинилэр сирдээбит сырдык суолларын салҕыыбыт.
Бу үөрүүлээх сырдык сааскы чаҕылхай күҥҥэ Сахабыт сирин олохтоохторугар, кэнчээри ыччаппытыгар чэгиэн буолууну, сайдыы саҕахтарын, үөрэх-билии чыпчаалларын эрэллээхтик дабайалларын баҕарабын!
Елена Потоцкая, edersaas.ru