Иван Охлопков кыайыытынан үөрэнээччилэригэр холобур буолар (ВИДЕО)

Сэтинньи 19 күнүгэр Пенза куоракка ыытыллыбыт «Fight Nights Global» диэн булкаастаах киирсиигэ«Sakha wrestling MMA» спортивнай кулууп салайааччыта, саха уола Иван Охлопков утарсааччытын Санкт – Петербургтан сылдьар Михаил Сарбашевы үс мүнүүтэ иһигэр бэриннэрэн кыайыы өрөгөйүн биллэ.

edersaas.ru

Иван «Fight Nights Global»-га ааспыт сылга киирсэр гына хантыраак баттаспыта. Ол эрээри дьарыктана сылдьан атаҕын оһоллоон киирсиитин көһөрбүтэ. Оттон атаҕын оһордубутун кэннэ күһүн промоушен дьоно сибээскэ тахсан, Махачкала куоракка ыҥыраннар киирсиитин туһунан сүбэлэспиттэр. Бэлэмнэниитин Москва куоракка Eagles MMA клубка биллэр тренер Ислам Каримов салалтатынан ааспыта.

Иван Охлопков,  «Fight Nights Global» тэрийбит киирсиитин кыайыылааҕа:

— Улахан махталбын миигин бэлэмнээбит тренербар Ислам Каримовка тиэрдиэм этэ. Ый иннинэ Москва куоракка тиийэн бэлэмнэниибин саҕалаабытым. Үчүгэй дьарык түмүгүн көрдөрдө. «Fight Nights» промоушен бэрэссэдьиэнэ Камил Гаджиев чугас доҕорум. Миэхэ маннык киирсиини тэрийбитигэр махталбын тиэрдэбин. Үөрэнээччилэрим Андрей Лаптев уонна Томпо улууһуттан Узаир Абдураков миигин кытта тэҥҥэ Москваҕа дьарыктаннылар. Кинилэргэ улахан уопут буолар. Ахсынньы 3 күнүгэр кинилэр эмиэ Eagles MMA тэрийэр күрэҕэр киирсиэхтээхтэр. Кинилэртэн ураты элбэх талааннаах  уолаттары эрчийэ сылдьабын. Бөҕөстөрүм Арассыыйа уонна норуоттар икки ардыларынааҕы күрэхтэргэ тахсан ситиһиилээхтик киирсэллэрин туһугар үлэлэһиэм.

Иван Охлопков үөрэнээччилэригэр бэйэтин холобурун көрдөрөн дьарыктыыра хайҕабыллаах. Эдэр кыахтаах уолаттары эрчийэн, үрдүкү күөҥҥэ таһаарар баҕа санаалаах ыччат тарбахха баттанар. Иван өссө да үрдүк ситиһиилэри көрдөрүө диэн эрэнэбит.

Николай Попов, «Саха сирэ» хаһыат, edersaas.ru