CӨ Бойобуой дьайыылар бэтэрээннэрин ассоциациятын бэрэссэдээтэлэ Иван Черкашин бэйэтин санаатын эттэ.
— Бүгүҥҥү күҥҥэ дойдутун таптыыр, дойдутун туһугар санаата охтор киһи буола турар быһыыны-майгыны билэ-истэ, долгуйа уонна ис санаатын этэр-үллэстэр кэмэ буолла.
Ханнык да кэмнээҕэр Арассыыйа тас дойдуларыттан тутулуга наһаа үрдээтэ, ону таһынан ньүдьү-балай сыһыан үөскээтэ, ыган киирэн бардылар диэххэ сөп. Спортсменнарбыт аата суох үрүҥ былаах аннынан, гиимнэ суох күрэхтэстилэр. Ол да буоллар Олимпиадаҕа Арассыыйа чиэһин көҕүстээхтик көмүскээтилэр.
Күһэллиилээх миэрэ ылыллара наадалаах курдук буолла. Бэйэлэрэ күөттээн биэрдилэр. Арассыыйа онорбут өҥөтүн-үтүөтүн умнан туран утары турдулар. Биһиги дойдубут науката, мэдиссиинэтэ аан дойдуга инники күөҥҥэ сылдьыбытын умнуо суохтаахпыт.
Биһигини баһылыыр былааспыт, бэйэбит талан ылбыт дьоммут сыыһа быһаарыныыны ылбатах буолуохтаахтар. Бэйэ дьонун утары үлэ ыыппатахтара чахчы. Биһиги бэрэсидьиэммит эттэ, ол аата оннук буолуохтаах! Путин бэйэтэ соҕотоҕун эрэ толкуйдаан, быһаарыыны ылымматаҕа чахчы, элбэх өйдөөх дьон ылыммыт күүстээх быһарыныылара буолар.
Мин Сэбиэскэй былаас иитиилээх буоламмын, ол сыллар экэнэмиичэскэй сайдыытыгар төнүннэриэхпин баҕарабын. Биһиги ол «тойотата», «мерседеһэ», «аудита» суох сатаан олоруохпут суоҕа дии саныыгыт дуо? Олорон буоллаҕа дии, өссө үчүгэйдик олоруо этибит. Биһиги саҕана, Сэбиэскэй Сойуус кыахтаах этэ: бэйэбит бырамыысыланнаспыт, сиртэн хостонор баайбыт, астан саҕалаан таҥаска-сапка диэри уонча сыл иннигэр улахан саппаастар баар буолаллар этэ. Харчыны тас дойдуга тэбээбэккэ эрэ, бэйэ экэниэмикэтин, тыа хаһаайыстыбатын лаппа сайыннарыахпытын сөп ээ, дьиҥэр.
Афганистаҥҥа буолбут сэриигэ 15 тыһыынчаттан тахса киһи өлбүтэ. Билиҥҥи туругунан, маннык сэриилэһэн бардахтарына, өлүү-сүтүү өссө элбэх буолуо. Ол иһин сэрии түргэнник тохтуон наада. Зеленскэй уонна Путин сөптөөх түмүгү оҥостоннор, кэпсэтии остуолугар эйэ дэмнээхтик олороллоро наада.