Таатта улууһун Уолба олохтооҕо Иван Боппосов мууһунан кэлэр сыл бэлиэтин Оҕуһу күрүөтүн аттыгар турарын оҥорбута, социальнай ситимнэргэ тарҕанна.
edersaas.ru
Иван Боппосов Уолбаҕа өрүү үүнэр сыл бэлиэтин ноһуомтан оҥорор Михаил Боппосов бииргэ төрөөбүт быраата. Иван Трофимович этэринэн, Боппосовтар аҕалара уус эбит. Онон уолаттар бары тарбахтарыгар талааннаах дьон.
— Быйыл нэһилиэк дьаһалтата Уолба күөлбүтүттэн ОДьКХ үлэһиттэринэн муус бэлэмнэтэн, табаарыспынаан Игнат Даниловтыын Оҕус бэлиэтин кыһан оҥордубут.
Оҕуспут күрүөтүн кытта нэһилиэкпит үрдүк дабааныгар турда.
Онон ыраахтан көстөн, Саҥа сылбыт бэлиэтэ буолан, сырдыкка, үтүөҕэ угуйа туруоҕа. Оҕуспут кээмэйэ — балтараа миэтэрэ. Бастаан бырайыакка баҕанаҕа баайыллан турар курдук этэ. Ону биһиги тыа олоҕун сирэйдээн, уларытан, күрүөлээн биэрдибит.Быйыл мууска саҥа ылыстым. Игнаттыын сүбэлэһэн, ким хайдах көннөрөрүнэн үлэлээтибит. Өссө манна уот-күүс эбиллиэҕэ, — диэн кэпсиир Иван Трофимович.
Иван Боппосов бэлиэтииринэн, уолбалар сибээстэрэ үчүгэй буолан, интэриниэтинэн көҥүл туһаналлар. Сүөһүгэ сыһыаннаах буолан, кини инстаграмын дьоруойдара сүрүннээн — ынах, оҕус сүөһү.
Иван Трофимович 2018 с. дьиэтин аттыгар Тымныы оҕуһу уонна Хаарчаананы массыынаҕа олордон, ол оҥоһугун киэргэтэн, эмиэ дьон болҕомтотун тарда сылдьыбыта.
Оҥоһугун киэһээ уоттаан-күөстээн биэрбитэ — Саҥа дьыллааҕы кэрэ көстүү этэ!
Ити курдук, норуоттан тахсыбыт талааннар — Боппосовтар аймах сыл аайы Саха сирин олохтоохторугар Саҥа дьыллааҕы тыыны бэлэхтииллэр. Ахсынньы 31 күнүгэр аны Михаил Боппосов сүөһүтүн сааҕынан оҥорбут бэрт интэриэһинэй скульптуратын кэтэһэбит. Киниэнэ мультипликационнай киинэ курдук өрүү дьиктилээхэй ис хоһоонноох буолааччы. Быйылгы сыл бэлиэтин — Оҕуһу дьэ хайдах ойуулаан соһутара буолла? Күүтэбит…
Оттон муус Оҕуһу быраата Иван Боппосов кыһа охсон, дьон дьүүлүгэр таһааран, быйыл убайыттан урутаата. Ол онтон саха дьонугар тыа сирин салгына илгийэргэ дылы буолла.
Елена ПОТОЦКАЯ, «Саха сирэ» хаһыат, edersaas.ru
Хаартыска — Иван Попов инстаграмыттан.