Дьокуускай куорат Петровскай уулуссатыгар турар дьиэ биир кыбартыыратыттан эһээхэй оҕо тохтоло суох ытыырын туһунан иһитиннэрии полиция дьуһуурунай чааһыгар муус устар 3 күнүгэр, сарсыарда 07.00 чаас саҕана киирбит.
Ыйыллыбыт аадырыска тута полиция 1 №-дээх отделын участковай боломуочунайа уонна сокуоннай саастарын ситэ илик оҕолор дьыалаларыгар (ПДН) иниспиэктэрэ тиийбиттэр.
Полицейскайдар ол тиийэн, оҕо ытыыр кыбартыыратын аанын тоҥсуйа сатаан баран, ким да аспатаҕын иһин, ааны алдьатан киирэргэ быһаарыммыттар. Онуоха төрүөтүнэн туох эрэ бөрүкүтэ суох быһыы-майгы буолбута эрэ буолбакка, ону таһынан, бу кыбартыыра хаһаайката оҕолорун көрбөккө-харайбакка, урут административнай эппиэккэ тардылла сылдьыбыта, учуокка турара эмиэ буолбут.
Полицейскайдар иһирдьэ киирбиттэрэ — дьыбааҥҥа 3 ыйдаах оҕо сэниэтэ суох иэрийэ-иэрийэ ытыы сытаахтыыр, аттыгар кураанах бытыылката эрэ баар, ким да суох эбит.
Ыҥырыынан кэлбит «суһал көмө» биригээдэтэ оҕону клиническэй балыыһа инфекционнай отделениетыгар илдьибит.
Сол сарсыарда оҕо ийэтин булбуттар. Бу 37 саастаах дьахтар 3 саастаах уолун батыһыннарбытынан, дьиэтиттэн кулун тутар 30 күнүгэр тахсан барбыт. Эһээхэй оҕотун хаста да сууттана сылдьыбыт 31 саастаах быраатыгар хаалларан барбыт.
Урут киһини кырбаан, өлөрөрүнэн суоһурҕанан сууттана, уопсастыбаннай сиргэ итирик сылдьан, күлүгээннээн, охсуһан-хайаан, хаста да административнай эппиэккэ тардылла сылдьыбыт бу киһийдэҕи куорат таһынааҕы сэлиэнньэттэн булбуттар.
Онтон ийэ буолуохсут эһээхэйин быраатыгар хаалларан баран, орто уолун батыһыннарбытынан, түөрт күнү быһа 17-с кыбартаалга дьону кэрийэн, арыгылыы сылдьыбыт. Бу уолчаанын Оҕо дьиэтигэр киллэрбиттэр.
Ити икки оҕотун таһынан өссө 10 саастаах уоллааҕа, тыа сиригэр аймахтарыгар иитиллэр эбит.
Билигин бу чахчынан РФ Холуобунай кодексатын 156-с ыстатыйатынан, ол эбэтэр, оҕоҕо кырыктаахтык сыһыаннаһан туран, иитэр эбээһинэһи толорбот буолуу бэлиэтэ баарынан, холуобунай дьыаланы тэрийэр туһунан боппуруос көрүллэр.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска уонна видео: СӨ ИДьМ-тын пресс-сулууспата.