Өрөспүүбүлyкэ үрдүнэн гаас утаҕын уһуна 2644 км. Бу утах киэҥ нэлэмэн иэннээх тыалары нөҥүөлээн, үрэхтэри, куталары туораан, нэһилиэнньэлээх пууннарга «күөх төлөнү» тиэрдэр. Биллэрин курдук, магистральнай гаас утаҕа ураты сэрэхтээх эбийиэгинэн билиниллэр.
Александр ТАРАСОВ, «Саха сирэ» хаһыат, https://edersaas.ru
Үрдүк күүрүүлээх утаҕы биэс анал пуун исписэлиистэрэ күнүстэри-түүннэри көрөллөр-истэллэр. Кинилэр кэрийэ сылдьан, сүрүн утах туругун бэрэбиэркэлииллэр, гаас ыгыыта төһөтүн кээмэйдииллэр. Быраабыла быһыытынан, магистральнай утах аттыгар сылдьыы кытаанахтык бобуллар. Ону сорох дьон кэһэр түгэннэрэ тахсыталыыр эбит.
Николай Кузнецов, «Сахатранснефтегаз» АУо линейнэй-көрөр-истэр сулууспатын начаалынньыга:
– Соторутааҕыта итирик туруктаах булчуттар Нам улууһун Кэҥкэмэ үрэҕин аттыгар баар гаас утаҕын аттынан төһө эмит бобор-хаайар бэлиэлэр туралларын уонна исписэлиистэр тохтото сатаабыттарын үрдүнэн, тимир көлөлөрүнэн харса суох ааспыттар. Итинник ньүдьү-балай сыһыаннаһар сыыһа. Быраабыла быһыытынан, бырамыысыланнас эбийиэктэрин аттыларынан харса суох сылдьар, чугаһыыр кытаанахтык бобуллар.
