Саас кэлбитинэн уруулга арыгы иһэн баран олорооччулар элбээн иһэллэр диэн СӨ ИДьМ-тын ГИБДД пропагандаҕа отдела иһитиннэрэр. Маныаха эмсэҕэлээччилэринэн кинилэргэ олорсубут дьон буолар.
Ол курдук, кулун тутар 18 күнүгэр, түүн 01.00 чаас саҕана, Ньурба улууһун полициятын дьуһуурунай чааһыгар иһитиннэрии киирбит. Бүлүү федеральнай суолун 798 километрыгар суол быһылаана буолбутун, дьон эмсэҕэлээбитин туһунан.
Быһылаан сиригэр тиийбит ДПС нэрээтэ быһаарбытынан, «Тойота Корона» массыынаны ыытан испит 44 саастаах киһи сатаан салайбакка, суолтан туораан, мэһэйгэ тиийэн түспүт. Ол түмүгэр, суоппар бэйэтэ уонна аргыһа төбөлөрүгэр улахан эчэйии ылан, уҥуохтара хас да сиринэн тостуулаах, улуустааҕы балыыһаҕа киллэриллибиттэр.
Суоппар быһаарыытыгар суруйбутунан, ити күн киэһэтигэр доҕорунаан арыгы испиттэр. Түүн дьиэлээри массыынатын собуоттаабытын, ол кэнниттэн балыыһа оронугар сытарын эрэ өйдүүр эбит. Саахал хаһан, хайдах буолбутун кини да, аргыһа да өйдөөбөттөр.
Арыгы испитин-суоҕун быһаарар медицинскэй туоһулааһыны барартан аккаастаммыт.
Кулун тутар 19 күнүгэр Хаҥалас улууһугар «Покровскай-Дьөппөн» мууһунан туоруур сиргэ «УАЗ-31519» 64 саастаах суоппара Тиит Эбэ сэлиэнньэтиттэн Покровскай куоракка айаннаан иһэн, уруулун сатаан салайбакка, утары суолга тахсан, «УАЗ Патриот» массыыналыын харсыспыт.
Медицинскэй туоһулааһын көрдөрбүтүнэн, бу киһи итирик эбит (0,42 мг/л итирдэр утах).
Бу суол быһылаанын түмүгэр, медиктэр көмөлөрө «УАЗ Патриот» массыына суоппарыгар уонна буруйдаах суоппар аргыһыгар наада буолбуттар. Кинилэргэ таһыттан сылдьан эмтэниини анаабыттар.
Бэрэбиэркэ кэмигэр быһаарыллыбытынан, «УАЗ-31519» суоппара сорудаҕы толорон, карьертан сүрэҕэ ыалдьыбыт кэллиэгэтин Покровскай балыыһатыгар илдьэн испит.
Арыгы испит киһини уруулга олордубут салайааччыны административнай эппиэккэ тардыбыттар, 20 тыһ. солк. ыстараап төлөөбүт.
Бу икки түбэлтэҕэ харсыһыылар суол эргиирдэригэр тахсыбыттар. Буруйдаах суоппардар сокуонунан эппиэттиэхтэрэ.
Биһиги корр., «Саха сирэ» хаһыат, edersaas.ru
Хаартыска: СӨ ИДьМ-тын ГИБДД пропагандаҕа отдела