Итирик суоппар буруйунан

Ааптар: 
Бөлөххө киир:

Уруулга арыгы иһэн баран олоруу иһин эппиэтинэс кытааппытын тимир көлөлөөхтөр бэркэ диэн билэллэр эрээри, итинник суол быһылааннара син биир тахса тураллар. 

  Эрдэ иһитиннэрбитим курдук, былырыын биһиги өрөспүүбүлүкэбитигэр итирик суоппар буруйунан тахсыбыт 58 суол быһылааныгар 14 киһи суорума суолламмыта, 86 киһи араас эчэйиини ылбыта. Бу тыыннаах ордубут дьон доруобуйата эмсэҕэлээтэҕэ, сорох инбэлиит буоллаҕа. Ити барыта уруулга итирдэр утаҕы ыймахтаан баран олорбут киһи бэйэ туһугар, дьон туһугар хайдахтаах эппиэтинэһи сүгэрин ситэ өйдөөбөтүттэн, чэпчэки сыһыаныттан тахсар. Оттон бу дьыл кулун тутар 18 күнүгэр Дьокуускай куоракка буолбут суол быһылаана дьону аймаата.

Ити күн, эбиэттэн киэһэ 15 ч. 14 мүн. СӨ Быыһыыр сулууспатыгар, онтон 15 ч. 16 мүн. Госавтоинспекция дьуһуурунай чааһыгар Можайскай уонна Жуковскай уулуссалар быһа охсуһууларыгар “Тойота Корона Премио”, “Тойота Королла”, “Тойота Ипсум” уонна КамАЗ массыыналар харсыспыттарын туһунан иһитиннэрии киирбит. Быыһааччылар быһылаан буолбут сиригэр 3 мүнүүтэнэн тиийбиттэр. Үлтү хомуруйбут массыынаттан дьону гидравлическай тиэхиньикэ көмөтүнэн орообуттар.

Бу суол быһылаана ыар содуллаах буолла — биир иномарка инники олбоҕор олорбут киэн туттар спортсменкабыт, кик-боксиҥҥа аан дойду хас да төгүллээх чемпионката, РФ боксаҕа уонна кик-боксиҥҥа спорт үтүөлээх маастара, 32 саастаах Лидия Андреева сырдык тыына быһынна.

Бу суол быһылаанын чахчытынан РФ Холуобунай кодексатын 264-с ыст. 4-с чааһынан, ол эбэтэр, уруулга итирик олорон, сэрэҕэ суохтан киһини өлүүгэ тиэрдии бэлиэтэ баарынан, холуобунай дьыала тэрилиннэ. Барыллаан быһаарыынан, КамАЗ-53212 массыына Марха бөһүөлэгин диэкиттэн кэлэн иһэн, Быковскай уулуссатын диэки салайаары, арытын тутуспакка, иннигэр айаннаан испит  “Тойота Королла» массыынаны саайбыт. Ол охсууттан «Тойота Королла» «Тойота Ипсум” иномаркаҕа тиийэн сааллыбыт. Ити кэнниттэн КамАЗ утары суолга тахсан, «Тойотой Корона Премио» массыыналыын харсыһан, иннигэр олорсон испит Лидия “суһал көмө” кэлиэр диэри тыына быстыбыт, үс киһини балыыһаҕа илдьибиттэр.

КамАЗ суоппарын алкотестерынан бэрэбиэркэлээбиттэрэ, 1,59 мг/л көрдөрбүт. Ити көрдөрүүгэ сөбүлэспэтэҕин иһин, нарколог-бырааска медицинскэй освидетельствованиеҕа илдьибиттэр. 48 саастаах суоппар докумуоннарын бэрэбиэркэлээбиттэрэ – былырыын олунньу ыйга массыына ыытар бырааба 18 ыйга быһыллыбыт эбит. Ону ааһан, 2001 сылтан саҕалаан, медосвидетельствование барартан аккаастаммытын иһин, административнай эппиэккэ иккитэ тардылла уонна уруулга итирик олорон, ГИБДД инспектордарыгар 5 (!) төгүл түбэһэ сылдьыбыт!

Биллэрин курдук, 2015 сыл от ыйын 1 күнүттэн РФ Холуобунай кодексатыгар 264.1 диэн ыстатыйа эбиллэн биэрбитэ. Бу ыстатыйа ирдэбилинэн, урут уруулга итирик олорон, административнай накаастабылга түбэспит киһи хаттаан оннук туруктаах тутулуннаҕына итиэннэ медосвидетельствование барартан аккаастаннаҕына, холуобунай эппиэккэ тардыллар. Эбэтэр массыынатын итирик ыыта сылдьан, суол быһылаанын таһааран, дьону эчэппит биитэр сэрэҕэ суохтан өлүүгэ тиэрдэн, сууттана сылдьыбыт буоллаҕына эмиэ.

Маныаха бу 264.1 ыстатыйа накаастабыл миэрэлэринэн буолаллар: аччаабыта – 200 – 300 тыһ. солк. суумалаах биитэр сууттаммыт киһи биир сылтан икки сылга диэри кэмҥэ ылбыт хамнаһын, атын дохуотун кээмэйин саҕа ыстараап, эбиитин үс сылга диэри болдьоххо тустаах дуоһунастарга үлэлиир бырааба быһыллар; улааппыта – икки сылга диэри көҥүлү быһыы уонна эмиэ үс сылга диэри болдьоххо тустаах дуоһунастарга үлэлиир быраабын быһыы. Оттон ити КамАЗ суоппара итирик түбэһэ-түбэһэ, туох да буолбатаҕын курдук салгыы айанныы сылдьан, итинник алдьархайга тиэртэҕэ. Кини буруйданар ыстатыйатынан накаастабыл миэрэ – 7 сылга диэри көҥүлү быһыы. Суут барыллааһын силиэстийэ кэмигэр Борис Шишмаревка хаарчахтыыр миэрэ быһыытынан, Силиэстийэлиир изоляторга хаайыыны тутунна.

Бу күннэргэ өссө биир холуобунай дьыала биллэн, дьон болҕомтотун тарта. Ол – Кэбээйи улууһун Кировскай уокуругун депутатыгар РФ Холуобунай кодексатын ити үөһэ быһаарбыт 264.1-с ыстатыйабынан уонна 318-с ыст. 1 чааһынан, ол эбэтэр, сулууспатын эбээһинэһин толоро сылдьар былаас бэрэстэбиитэлигэр олоҕор, доруобуйатыгар куттала суох күүһү туттуу бэлиэтэ баарынан, дьыала тэрилиннэ.

Бу депутат 2015 сыл алтынньы ыйыгар массыынатын арыгы иһэн баран ыыта сылдьан түбэһэн, административнай эппиэккэ тардыллыбыт уонна бырааба быстыбыт эбит. Ону уруок оҥостубакка, аны бу дьыл олунньу 19 күнүн киэһэтигэр эмиэ итирик ыыта сылдьан түбэспит. ГИБДД инспектордара бэрээдэгэ суох депутаты дьуһуурунай чааска илдьибиттэригэр, биир полицейскайы сутуругунан түөскэ, иккиһин хаста да төбөҕө охсубут. Итирдэр утах кими тэмтэритэригэр дьаалыйбат буоллаҕа…

Өссө биир сонун. Бу дьыл кулун тутар 26 күнүттэн медицинскэй освидетельствование саҥа бэрээдэгэ олоххо киирэр. Нарколог быраас түмүк таһаарарыгар, алкотестер көрдөрүүтүн сэргэ, итирии клиническэй бэлиэлэрин эмиэ учуоттуур бырааптанар. Маныаха тутуллубут киһиттэн иик уонна хаан анаалыстарын булгуччу ылар эбээһинэстэнэр. Ити тутуллубут киһи наркотиктан туймаарыйа сылдьарын-сылдьыбатын быһаарар сыалтан оҥоһуллар.

Вера МАКАРОВА.

  “Саха сирэ” 2016 сыл кулун тутар 24 күнэ.

+1
0
+1
0
+1
0
+1
0
+1
0
+1
0
+1
0