Эрэстээрэҥҥэ, түүҥҥү кулууптарга итирдэр утаҕы ыймахтаабыт киһи сэрэҕин сүтэрэрэ биллэр суол буоллаҕа. Чиэһинэйэ суох киһи онон туһанара чуолкай. Куруук этиллэрин курдук, итирик киһи буруй сиэртибэтэ буолара дэбигис.
СӨ ИДЬМ-тын пресс-сулууспата иһитиннэрбитинэн, Дьокуускай куорат полициятын дьуһуурунай чааһыгар биир киһи эрийэн, түүҥҥү кулуупка сынньаммытын, ол түмүгэр, суотабай төлөпүөнүн уонна хары чаһытын уордарбытын кэпсээбит. Уопсайа 90.000 солк. сууммалаах хоромньуламмыт.
Киин куорат полициятын оперативниктара бу уорууга уорбаланааччыны туппуттар — урут холуобунай эппиэтинэскэ тардылла сылдьыбыт 29 саастаах киһи эбит.
Итиччэ сыаналаах маллары 3.000эрэ солкуобайга батара охсубут.
Онтон Мииринэй куоракка биир киһи баанын каартатын уонна онно баар 430.000 солк. харчытын уордарбыт.
Оперативниктар уорбаланааччыны туппуттар — Бурятияттан төрүттээх 32 саастаах киһи эбит.
Барыллаан быһаарыынан, эмсэҕэлээччи уорбаланааччылыын ити күн иннинэ бииргэ арыгылаабыттар. Онтон арыгылара бүппүтүгэр, анараа киһини «маҕаһыыҥҥа баран кэл» диэн көрдөһөөччү буолбут. Уонна пин-кодун этэн туран, баанын каартатын туттаран кэбиспит.
Маҕаһыынтан кэлэн баран, каартаны кырдьык-хордьук төннөрбүт. Ол эрэн, киһитэ итирэн охтубутун кэнниттэн уоран ылбыт.
Дьэ, уонна иһиттиэм-истибэтиэм диэбиттии, чугастааҕы банкомакка элээрдэн тиийэн, 430 тыһыынча харчыны устубут уонна эрэстэрээннэринэн кэрийэн, билэр-билбэт дьоннорун уҥа-хаҥас күндүлээн-аһатан, дьэргэстэй ыһыаҕын ыспыт.
Бу чахчыларынан «Уоруу» ыстатыйанан холуобунай дьыалалар тэриллибиттэр.
Биһиги корр., «Саха сирэ» хаһыат, edersaas.ru
Хаартыска: интэриниэттэн.