Бэҕэһээ Владимир Путин итэҕэллээх дьонун кытары көрүстэ. Көрсүһүүгэ кини “үөрэххэ, промышленноска, тыа хаһаайыстыбатыгар, ыччаты иитиигэ, социальнай эйгэҕэ, култуураҕа, искусствоҕа, о.д.а. туох кыһалҕа баарын истиҥ” диэн эттэ.
Владимир Владимирович барыта 476 киһини итэҕэллээх дьоннорунан регистрациялаабыта. Кинилэр ортолоругар Саха сириттэн “Анаабыр алмаастара” хампаанньа генеральнай дириэктэрэ Павел Маринычев, Саха эстрадатын театрын дириэктэрэ Алексей Егоров уонна Үлэ Геройа, Хаҥалас улууһун ойуурун хаһаайыстыбатын салайааччыта Варвара Устинова бааллар.
Көрсүһүү саҕаланыан иннинэ Владимир Путин саалаҕа мустубут хас биирдии киһи бэйэтин эйгэтигэр лидер буоларын бэлиэтээн туран, быыбар туһунан дьоҥҥо-сэргэҕэ элбэхтэ кэпсиэххэ наадатын, онуоха биир киһи хайдах да дойдуну барытын хаппатын, миэстэтигэр итэҕэллээх дьоннор үлэни ыытыахтаахтарын иһитиннэрдэ. “Быыбарга докумуону туттарыы, илии баттааһынын хомуйуу сүрүнэ буолбатах. Манна дьону-сэргэни кытары көрсүһүү быһаарар оруолу ылар. Биһиги экономикабытын сайыннарыыга, олохпутун тупсарыыга үгүһү оҥордубут. Итини сэргэ кыалла илик боппуруостар эмиэ бааллар. Бары эйгэни хабан ханна, туох кыһалҕа баарын, нэһилиэнньэ туох санаалаах олорорун билиэҕиҥ, истиэҕиҥ”, — диэн бэлиэтээтэ.
Санатан эттэххэ, Владимир Путин Саҥа Дьыл иннинэ “Биир ньыгыл Россия” баартыйа съеһигэр экономиканы бөҕөргөтүүгэ этиилэри киллэрбитэ. Онно кини доруобуйа харыстабылыгар, чөл олоҕу тутуһууга, социальнай эбийиэктэри тутууга, инфраструктураны сайыннарыыга, нэһилиэнньэлээх пууннары тупсарыыга, дьон дохуоттаах буолуутун ситиһиигэ болҕомтотун уурбута. Онуоха үөрэххэ, наукаҕа, үрдүкү технологияны киллэриигэ үлэ күүскэ барыахтааҕын эппитэ. Бу да сырыыга итини барытын этэн туран: “Бу хайысхаларга биһиги бииртэн биир үктэли ылан иһиэхтээхпит. Экономика түһүүтүттэн-тахсыытыттан тутулуга суох сайдыы иннин хоту баран иһиэхтээх”, — диэн бэлиэтээтэ.
Аграфена КУЗЬМИНА, “Саха сирэ” хаһыат, edersaas.ru