Эдэр киһи биэнсийэлээх кырдьаҕас итэҕэлин туһанан, 60 тыһыынча солкуобайын уорбут.
ИДьМ Дьокуускайдааҕы 3 №-дээх дьуһуурунай чааһыгар 60 тыһыынча солк. уоруллубутун туһунан биэнсийэлээхтэн сайабылыанньа киирбит. Суһал көрдөөһүнүнэн, холуобунай ирдэбил үлэһиттэрэ уорбаланааччыны туппуттара. Уорбаланааччы 21 саастаах Дьокуускай куорат олохтооҕо эбит. Кини биэнсийэлээх кырдьаҕаһы билэр буолан 500 солк. иэс көрдөөбүт. Онуоха кырдьаҕас киһи эрэнэн баан каартатын уларсыбыт уонна харчыны устан баран, каартаны аҕаларыгар сорудахтаабыт. Онуоха уорбаланааччы 500 солкуобайы устуохтааҕын оннугар, 30 тыһыынча солк. устубут уонна каартаны аҕалан биэрбит. Сотору кэминэн иккистээн кэлбит уонна биллибэтинэн каартаны уорбут. Эбии 30 тыһыынчаны устубут. Иэһин төлүүр аатыран кэлэн баран, каартаны миэстэтигэр уурбут. Кырдьаҕас киһи итэҕэлин туһанан харчы уорбутун иһин, РФ холуобунай кодексатын 158 ыст. 3 -с чааһынан «Уоруу» диэн холуобунай дьыала тэриллибит. ИДьМ пресс-сулууспата иһитиннэрбитинэн, буруйу оҥоруу иһин 6 сылга хаайыы болдьоҕор ууруллуон сөп.
Ульяна Захарова