Итальянец тохсунньу тоһуттар тымныытыгар сүүрүөҕэ (ВИДЕО)

Италия 50 саастаах олохтооҕо, полиция үлэһитэ, сүүрүүк Паоло Вентурини Саха сиригэр кэлэн -60 кыраадыстаах тымныыга сүүрэр соруктаах. Кини былырыын олунньуга кэлэ сылдьыбытыгар -43 кыраадыс тымныы этэ. Паоло Өймөкөөнтөн Томторго (38 км кэриҥэ) диэри сүүрэр былааннаах. 

«Мин санаабыппын ситиһэр киһибин. Ол эрээри Арассыыйа дьоно сэрэхэдийдилэр, хайдах оннук тымныыга түөрт чааһы быһа сүүрэҕиний диэн. Мин уоскутуохпун баҕарабын, онно соҕотох буолбаппын. Хамаандабар алта киһи баар — икки быраас, документальнай киинэ устар дьон, тылбаасчыт. Сэрэнэн сүүрүөхпүн наада, аһары түргэнник сүүрдэхпинэ, өссө тымныйан биэриэ», — диэн Италия саайтыгар кэпсээбит.

Паоло Саха сирин тымныытыгар сүүрэргэ биир сыл бэлэмнэннэ. Бу иннинэ кини 67 кыраадыстаах итиигэ Иран Дашт-эль-Лут диэн сиригэр сүүрбүтэ. Ону кыайан баран, аны саамай тымныы сиргэ сүүрэр эбиппин диэн толкуйдаабыт. Сүүрүүтүн тохсунньу 17-22 күннэригэр былаанныыр. «Киһи кыаҕын, күүһүн бэрэбиэркэлээн көрүөм. Ханнык баҕарар спорт көрүҥэ киһини тупсарар, эрчимирдэр, итиэннэ киһи сатаабатаҕа диэн суох«, — диир Паоло Вентурини.

Былырыын Саха сиригэр кэлэ сылдьан устубут видеота.

edersaas.ru