Муус устар 30—ыам ыйын 2 күннэригэр Италия Пезаро куоратыгар Джоакини Россини аатынан Опера тыйаатырыгар «Российские вечера в Италии-2017» бэстибээл ыытылынна.
Надежда ЕГОРОВА, «Саха сирэ» хаһыат, edersaas.ru
Бу бэстибээлгэ Саха сириттэн соҕотоҕун кыттыбыт Марианна Романова-Тайыына I истиэпэннээх лауреат, ону сэргэ, бэстибээл анал бирииһин хаһаайката буолан, өттүк харалаах, илии тутуурдаах эргилиннэ.
Сунтаар Куокунутуттан төрүттээх Марианна Романова-Тайыына 60-тан тахса ырыалаах мелодистка, СӨ норуодунай, РФ үтүөлээх артыыһа Юрий Платонов салайар Эстрада өрөспүүбүлүкэтээҕи айар мастарыскыайын бүтэрбитэ. Билигин Чурапчы улууһун Эбии үөрэхтээһин оҕо дьоҕурун сайыннарар «Үөрүү» киинин фольклорга уонна эстрада ырыатыгар куруһуогун салайааччыта.
«Российские вечера в Италии-2017» бэстибээл Италия уонна Арассыыйа Култуураларын министиэристибэлэрин, консульстволар өйөбүллэринэн үһүс сылын тэриллэр. Ол курдук, икки дойду култууратын алтыһыытын көҕүлээн, бэстибээли тэрийэн Жанна Байбакова, Кристиан Карточетти сүҥкэн кылааты киллэрбиттэр.
Далааһыннаах тэрээһиҥҥэ 9 араас дойдуттан тыһыынчанан ахсааннаах кыттааччы 300-чэ нүөмэри көрдөрдө. Түмүккэ, Гран-при хаһаайынынан Арассыыйаттан төрүттээх, билигин Словенияҕа олорор, норуот ырыаларын толорор «Девчата» бөлөх буолла. Бэстибээл ырыа-үҥкүү, инструментальнай муусука, муода, дизайн, уруһуй, прикладной искусство, хаартыскаҕа түһэрии уо.д.а курдук элбэх жанры хабар буолан, киһи сэҥээрэрэ элбэх.
Саха кыыһа Тайыына Италияҕа кыайыытын туһунан маннык сэһэргиир:
— Мин бэйэм кэтээн көрбүппүнэн, араас күрэстэр хас эмэ төгүллээх кыайыылаахтара кытыннылар, дьүүллүүр сүбэ чилиэннэрэ эмиэ үрдүк таһымнаахтар. Ыытыллыбыт сирэ даҕаны мээнэ талыллыбатах. Европа биир биллэр тыйаатыра, ол эбэтэр аан дойду кырдьаҕас тыйаатырдарыттан биирдэстэрэ, Италия биллиилээх композитора Джоакини Россини үлэлээбит, айбыт-туппут тыйаатырыгар буолла. Бэстибээлгэ үксэ Европаҕа, Канадаҕа олорор, Арассыыйаттан төрүттээх талааннаах дьон кыттыыны ыллылар. Онон, дойду ахтылҕаныгар куустара сылдьар дьон мустар улахан түһүлгэтэ эбит дии санаатым. Тоҕо диэтэххэ, кэнсиэр кэнниттэн элбэх киһи кэлэн эҕэрдэлээбитэ, махтаммыта, бииргэ хаартыскаҕа түспүттэрэ да туоһулуур. Үгүстэрэ Саха сирин үчүгэйдик билэллэриттэн үөрдүм. Ол эрээри: «Саха ырыатын, тойугун, хомуһун олох билбэт эбиппит. Киэҥ Арассыыйабыт биир ураты култууратын сырдаппыккар, билиһиннэрбиккэр дириҥник махтанабыт», – диэн ис дууһаларыттан тахсар махтал тылларын этэн, бэйэбин үрдүккэ кынаттаатылар. Саха сириттэн соҕотох бэрэстэбиитэл буоламмын, эппиэтинэһим да улахан.
Тайыына долгуйуон долгуйар. Наҕараадалааһын биллэриллибитигэр, саха талааннаах кыыһа былааҕын тутан тахсыбытыгар, көрөөччүлэр ытыс хабыллар тыаһынан уруйдаабыттар.
Татьяна Романова-Тайыына күннээх Италияны илэ хараҕынан көрөн, саха кылыһахтаах ырыатын, тойугун, хомус алыптаах дорҕоонун иһитиннэрэн, аан дойду араас омугун култууратын билсэн, ситиһии кэһиилээх эргиллибитигэр бар дьонугар махтала улахан.
«Киэҥ далааһыннаах тэрээһиҥҥэ ситиһиим – олохпор куруук суолдьут сулус буолар Елена Сивцева, «Үөрүү» оҕо дьоҕурун сайыннарар киин дириэктэрэ Иван Уаров, биир идэлээхтэрим, үөрэх управлениетын профсоюһун бэрэссэдээтэлэ Егор Давыдов, Чурапчы нэһилиэгин баһылыга Степан Саргыдаев, Олоҥхо тыйаатырын сүрүн артыыската Степанида Борисова, аймахтарым, доҕотторум кыайыылара», – диир Тайыына.
Надежда ЕГОРОВА, «Саха сирэ» хаһыат, edersaas.ru