Италияҕа Калабрия эрэгийиэнигэр Чинкуэфронди хомууна салалтата 1 евроҕа муниципалитет дьиэтин атыылыыр бырагырааманы үлэлэтэн эрэр. Сицилияҕа эмиэ маннык бырагыраама үлэлиир.
Бу эрэгийиэҥҥэ коронавирус содулуттан ордук хамсаабат баай-дуол ырыынага эмсэҕэлээбит. Ханна да буоларын курдук, ыччаттара олохсуйбакка, киин сир диэки талаһаллар эбит. Ол иһин дьону олохсутар, нэһилиэнньэни элбэтэр туһуттан, маннык бырагырааманы толкуйдаабыттар.
“Билиҥҥи кэмҥэ биһиги эрэгийиэммитигэр биир да киһи коронавируһунан ыалдьыбат”, — диэн мэр эрэннэрэр.
Бырагыраама сүрүн усулуобуйата – атыылаһан баран, үс сыл иһигэр өрөмүөн оҥоруохтааххын. Оҥоруоҥ иннинэ усунуоһу — 250 евроны уонна нолуогу төлүүгүн. Үс сыл иһигэр өрөмүөннээбэтэххинэ, эбэтэр бүтэрбэтэххинэ, 20 тыһыынча евронан ыстарааптанаҕын, эбэтэр төттөрү былдьыыллар.
Сүрүннээн, бу былыргы, киһи олорбот таас тутуулара. Онон хапытаалынай өрөмүөнү эрэйэллэр. Ол эрээри, киһи син олоруон сөптөөх дьиэлэрэ бааллар үһү. Бу — кыбартыыралар буолбатахтар, 1,2 этээстээх таас дьиэлэр. Омук дьонугар биэрэллэр, ол гынан баран, үксүгэр бастайааннай олохсуйан олорор баҕалаах эдэр дьону талаллар.
Дьэ, интэриэһинэй. Күннээх Италияҕа баран олохсуйуохтарын баҕарар дьоҥҥо бэртээхэй бырагыраама эбит. Оттон биһиги дойдубут салалтата Уһук Илиҥҥэ дьону олохсутар баҕаттан, 2%-наах ипотека бырагырааматын үлэлэтэр.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн