»Вся Россия» норуоттар икки ардыларынааҕы суруналыыстар пуорумнарыгар Саха сирин Суруналыыстарын сойууһа »Журналисты Якутии» энциклопедияны сүрэхтээтэ. Маны эрэгийиэннэр суруналыыстара сэргии иһиттилэр, бэйэлэрин санааларын үллэһиннилэр.
Владимир Соловьев, Арассыыйа Суруналыыстарын сойууһун бэрэссэдээтэлэ:
— Мин Саха сиригэр хаста да кэлэ сылдьыбытым. Өлүөнэ очуостарын дабайан турардаахпын. »Газпром» рекламата кэллэр эрэ, наар ону саныыбын.
Саха сирин Суруналыыстарын сойууһа дойдуга биир саамай көхтөөх, бөдөҥ, айар түмсүү быһыытынан биллэр. Тыһыынчаттан тахса чилиэннээх сойуус биһиэхэ аҕыйах. Бэйэтэ үгэстэрдээх, үлэлиир бырайыактардаах, сайдан, үүнэн иһэр сойуус буолар.
Мин санаабар, национальнай тыллары харааннаан хаалларар, сайыннарар хайаан да наада. Саха сиригэр уонна Татарстаҥҥа национальнай тылларын сайыннарарга үлэ барарын бэлиэтии көрөбүн. Бу саҥа тахсыбыт энциклопедия сойуус айымньылаах үлэтин биир көстүүтэ буолар.
Салгыы тыл эппит дьон санаалара маннык буолла: »суруналыыстар куруук дьон туһунан суруйаллар, бэйэлэрин туһунан букатын умнан кэбиһэллэр. Онон биһиги хайдах курдук бэриниилээхтик үлэлиирбитин, түүннэри суруйарбытын, ууга-уокка да киирэрбитин эмиэ суруйуох, үйэтитиэх тустаахпыт», »энциклопедия бастакы кинигэтэ тахсыбыт, ол аата кэнники иккис, үһүс кинигэлэрэ тахсыахтарын сөп», »бу олох ураты, историческай суолталаах үлэ эбит», о.д.а.
Бу курдук, атын эрэгийиэннэртэн сылдьар кэллиэгэлэрбит сонун уопуту биһирээбиттэрин биллэрдилэр.
Ангелина Васильева, »Саха сирэ» хаһыат, edersaas.ru
Хаартыска: ааптар түһэриитэ.