«Исток» хампаанньа тоҕо арыгыны «Хомус» диэн ааттаабытыгар хоруйу күүтэбит

Соторутааҕыта «Исток» тэрилтэ «Хомус» диэн ааттаах аһыы утаҕы оҥорбутун туһунан батсаап ситиминэн тарҕаммыта. Биллэн турар, уопсастыба тута сөбүлээбэтэҕин биллэрбитэ. Киһи кыһыйыах, арыгы иһитигэр төлөпүөн камератын туһаайдахха, хомус тыаһа дьүрүһүйэр эбит. Бүгүн Хомус мусуойугар СӨ култуураҕа миниистирин э.т. Владислав Левочкин кыттыылаах пресс-кэмпириэнсийэ буолла.

Кэмпириэнсийэҕэ Хомус мусуойун дириэктэрэ Дмитрий Бястинов: «Ааспыт нэдиэлэҕэ «Хомус» диэн ааттаах-суоллаах арыгы атыыга тахсан, барыбытын соһутта. Аһыы утаҕы атыыга таһаарбыт «Исток» хампаанньа салалтатыгар анал суругу ыыттыбыт. Туох диэн эппиэттииллэрин күүтэбит. Хомус диэн ааттаах, графическай ойуулаах үс көрүҥү оҥорбуттар», — диэн санаатын үллэһиннэ.

СӨ култуураҕа миниистирин э.т. Владислав Левочкин: «Бу сөбө суох быһыыны суруналыыстар күүскэ тарҕатаргытыгар көрдөһөбүн. Тустаах суругу «Исток» хампаанньаҕа, федеральнай антимонопольнай управлениеҕа ыыттыбыт. Манна сокуону икки өрүтүнэн кэһии баар. Бастакытынан, хомус материальнайа суох нэһилиэстибэҕэ киирбитинэн сибээстээн, бренд быһыытынан туһаныллыа суохтаах. Иккиһинэн, рекламаҕа сааһын ситэ илик кыыһы туһаммыттар диэн көрдүбүт. Онон билигин тустаах тэрилтэ хоруйун күүтэбит», — диэн эттэ.

Александр Тарасов.