Саха сирин бырабыыталыстыбата ойуур баһаарыттан дьон олорор сирдэрин көмүскүүр миэрэлэри бигэргэттилэр. Ылыллыбыт докумуоҥҥа ойуур уотуттан эмсэҕэлиэхтэрин сөптөөх нэһилиэнньэлээх пууннар испииһэктэрэ кэҥэтиллибит. Эрдэ маннык куттал баара 334 нэһилиэнньэлээх пууҥҥа бэлиэтэммит буоллаҕына, билигин 475-кэ тиэрдиллибит.
Бу испииһэккэ тыа эргийэр куораттара уонна бөһүөлэктэрэ киллэриллибиттэр. Ол аата, балары ойуур уотуттан харыстааһыҥҥа, көмүскээһиҥҥэ ураты болҕомто ууруллуоҕа. Нэһилиэнньэлээх пууннарга суһаллык биллэрии тарҕатар систиэмэ, хараардыы балаһалара эрдэттэн бэлэм буолуохтаахтар. Оттон ону толорорго муниципалитеттар эрдэттэн үп анаан дьаһаныахтаахтар.
Уот хабыан сөптөөх кутталыгар киирсэр оҕо доруобуйатын чэбдигирдэр лааҕырдар, саад уонна оҕуруот табаарыстыбаларын, даачалар испииһэктэрэ эмиэ саҥардылынна. Былырыын маннык тэрилтэлэр 51 эбит буоллахтарына, 2022 сылга 123 тэрилтэ буолбут.
Докумуоҥҥа ойуур бааһара тахсар түгэнигэр суһаллык быһаарыллыахтаах миэрэлэр, эрдэ ыытыллар өйдөтөр-сүбэлии үлэлэр, ирдэбиллэр ыйыллыбыттар, министиэристибэлэргэ, аналлаах салалталарга, муниципалитеттарга толоруохтаах эбээһинэстэрэ үллэриллибит.
Бары биэдэмэстибэлэр сааһыланан сөпкө үлэлииллэрин Арассыыйа ЫБММ кылаабынай салалтата кэтээн ыытыаҕа.
«Саха сирэ» хаһыат, edersaas.ru
Хаартыска sakha.gov.ru