Улуу Кыайыы 73 сылын дойду үрдүнэн “Ким да умнуллубат, туох да умнуллубат” девизтээх өрө көтөҕүллүүлээхтик бэлиэтээтибит.
Биллэрин курдук, сэрии ыар тыына фроҥҥа эрэ буолбакка, фронтан хас эмэ уонча тыһыынча биэрэстэ ыраах сытар Саха сирин тыатын сиригэр дьон олоҕун отуорун эмиэ алдьаппыта.
Ыам ыйын 8 күнүгэр Тойбохой нэһилиэгэр холкуос олоҕун тыыннаах туоһуларыгар олоҕуран, “Сүрэх оспот бааһа” икки көстүүлээх испэктээкил туруорулунна. Кулууп дириэктэрэ Н.Н.Павлова сценарийынан, уус-уран салайааччы А.Е. Титова туруоруутунан оччотооҕу кэми кырдьыктаахтык көрдөрбүт испэктээкили олохтоохтор сэргээтилэр.
Испэктээкилгэ Саха сирин холкуостаахтарын сэрии иннинээҕи байылыат олохторуттан саҕалаан, сэрии сылларын аас-туор олохторун киллэрэн туран, Кыайыы өрөгөйүн билиэхтэригэр диэри кэм итэҕэтиилээхтик тыктарыллар. Испэктээкили Тойбохойдооҕу “Дуораан “ ансаамбыл сэрии саҕанааҕы ырыалара киэргэттилэр.
Испэктээкил кэнниттэн «Өйдөбүнньүк чүмэчитин» тула мустан, сэрии хонуутугар охтубут биир дойдулаахтарын ахтан-санаан ыллылар.
Онтон ыам ыйын 9 күнүгэр нэһилиэк олохтоохторо Кыһыл Сулус уордьаннаах, быйыл сайын 100 сааһын туолуохтаах бойобуой офицер Трофим Николаевич Жирков кыттыылаах парадтаан ньиргиттилэр. Дьон-сэргэ кыайыы вальсын үҥкүүлээтэ, түүн 12 чааска хараҥа халлааҥҥа салют ньиргийдэ.
Болдьообут курдук, халлаан да туран биэрдэ. Дьон-сэргэ бырааһынньыгы өрө көтөҕүллүүлээхтик атаарда.
Надежда ЕГОРОВА, «Саха сирэ» хаһыат, edersaas.ru