Санкт-Петербурга сцена ускуустубатыгар үөрэтэр Арассыыйа судаарыстыбаннай институтун аччыгый саалатыгар (РГИСИ) “Оонньоммотох оруоллар” испэктээк буолла. Испэктээги Дьокуускайтан тиийбит култуура уонна ускуустуба кэллиэһин устудьуоннара оонньоон көрдөрдүлэр.
Кэллиэс дириэктэрэ Захар Никитин:
—Испэктээккэ 1940-1941 сылларга Ленинград куоракка театральнай институкка артыыс идэтигэр Саха сириттэн үөрэнэ тиийбит национальнай устуудьуйа оҕолорун дьылҕалара кэпсэнэр. Бу испэктээги быйыл, алтынньыга, аан бастаан Дьокуускайга Саха академическай драматическай тыйаатырыгар көрдөрбүппүт.
Манна, Питергэ, Ленинград блокадатын кыттыылааҕа Ирина Кривых испэктээги көрөн баран улаханнык долгуйбутун, уйадыйбытын биллэрдэ. Улуу Кыайыы үбүлүөйдээх сылыгар бу испэктээги өрөспүүбүлүкэҕэ эрэ буолбакка, киэҥ сиринэн тэлэһийэ көтөн көрдөрөрбүтүгэр баҕарда. Оттон Ленинград оборонатын мемориальнай музейын дириэктэрэ Елена Лезик түмэлгэ ыҥырда уонна испэктээги эһиил хайаан да онно көрдөрөрбүтүгэр көрдөстө. РГИСИ дириэктэрэ Наталья Пахомова сибээспитин өссө чиҥэтэн үлэлэһэрбитигэр, бу курдук үлэҕэ, үөрэххэ билиибитин-көрүүбүтүн, үөрүйэхпитин атастаһа турарбытыгар баҕарда, — диэн иһитиннэрдэ.
РФ Бэрэсидьиэнигэр СӨ бастайааннай бэрэстэбиитэлин солбуйааччы Юрий Кравцов Ленинград блокадатын 75 сылыгар анаан туруоруллубут уонна Тыйаатыр сылыгар көрдөрүллүбүт испэктээктэрин иһин махтаммыт. Оттон устудьуон ыччаттар оруолларын ис сүрэхтэриттэн чугастык ылынан, улаханнык долгуйан туран оонньообуттарын эппиттэр.
Кэллиэс дириэктэрэ Захар Никитин саалаҕа мустубут ыалдьыттарга махтанан туран, РГИСИ 240 сылынан истиҥ эҕэрдэтин тиэрдибит, 1940 сыллаахха Ленинградка үөрэнэ тиийбит Саха сирин национальнай бөлөҕүн устудьуоннара түспүт хаартыскаларын анаан оҥотторбуттарын уонна чочуонай чороону ахсаабат ытыс тыаһыгар доҕуһуоллатан бэлэх ууммут.
Испэктээктэн улаханнык уйадыйбыт көрөөччүлэр устудьуоннарга ис сүрэхтэн тыллан тахсыбыт истиҥ тылларын тиэрдибиттэр, эдэрдэр устуоруйаны өйдүү-саныы сылдьалларыгар махтаммыттар.
Санатан эттэххэ, 1940 сыллаахха Саха сириттэн эдэркээн кыргыттар уонна уолаттар, барыта 34 ыччат, түһээн да көрбөтөх ырыых-ыраах баар Ленинград диэн кэрэ куоракка тыйаатыр артыыстарын бэлэмниир институкка үөрэнэ барар улахан дьолго тиксибиттэрэ. Алаастарыттан ыраах тэлэһийбит оҕочооннор үрдүк үөрэх кыһатыгар бары кыһамньыларын, болҕомтолорун ууран үөрэнэ сырыттахтарына, уоттаах сэрии аан дойдуну атыйахтаах уу курдук аймаабыта. Устудьуон ыччаттар дьоллоох кэмнэрин кырыктаах сэрии ыар тыына ыарыылаахтык туора илгибитэ.