Саха Өрөспүүбүлүкэтин Судаарыстыбаннаһын күнүгэр Искэни эмтиир өрөспүүбүлүкэтээҕи киин сыбаайата түһэрилиннэ. Саҥа эбийиэк Петр Алексеев уулуссатын 89 нүөмэригэр (урукку оҕо сэллигин эмтиир санаторий оннугар) баар буолуоҕа.
edersaas.ru
Сыбаайаны түһэриигэ СӨ Ил Дархана Егор Борисов, СӨ Судаарыстыбаннай Мунньаҕын (Ил Түмэн) бэрэссэдээтэлэ Александр Жирков, СӨ доруобуйа харыстабылын миниистирэ Михаил Охлопков, искэни эмтиир өрөспүүбүлүкэтээҕи диспансер кылаабынай бырааһа Лена Афанасьева уо.д.а. кытыннылар.
Егор Афанасьевич кэнники сылларга өрөспүүбүлүкэҕэ бу хайысхаҕа биллэр ситиһиилэр, эмтээһин өҥөлөрүн хаачыстыбатын үрдэтиигэ дьоһун быһаарыылар ылыллыбыттарын, үрдүк технологиялаах медицина сайдарын бэлиэтээтэ.
«Өрөспүүбүлүкэ олохтоохторун доруобуйалара ураты болҕомтону эрэйэрин биһиги өйдүүбүт. Искэни эмтиир эбийиэги тутар эбээһинэстээхпит», – диэн Ил Дархан Искэни эмтиир киини тутуу бырабыыталыстыба, муниципальнай былаастар уонна уопсастыбаннас эппиэтинэстэрэ буоларыгар болҕомтотун уурда.
«Бу эбийиэк тутулларын биһиги ыарыһахтарбыт, кэлэктииппит, бэтэрээннэрбит өр күүппүттэрэ. Доруобуйа харыстабылын Бүтүн аан дойдутааҕы тэрилтэтин чахчытынан, кэлэр уон сылга искэн ыарыыта аан дойдуга барытыгар элбиэҕэ. 2016 с. Арассыыйаҕа эмиэ ыарыһах ахсаана элбээн, 500 тыһыынчаттан тахса саҥа ыарыһах булулунна. Оттон Саха Өрөспүүбүлүкэтигэр искэн 20 бырыһыан элбээбитэ бэлиэтэннэ. Биһиги бары уопсай күүспүтүнэн эрэ бу уустук балаһыанньаны көннөрүөхпүтүн сөп», – диэн диспансер кылаабынай бырааһа Лена Афанасьева эттэ.
Саҥа эбийиэк радиология отделениелаах уонна хаһаайыстыбаннай блоктаах буолуоҕа. Тутуу үс түһүмэҕинэн ыытыллыаҕа. Аан бастаан поликлиникалаах, стационардаах, радиология отделениелаах уонна хаһаайыстыбаннай блоктаах киин тутуллуоҕа. Онтон ядернай медициналаах диагностыыр киин баар буолара былааннанар. Ол кэнниттэн пансионат эбэтэр гостиница комплекса тутуллан үлэлиэхтээх.
ЫСПЫРААПКА:
– Суукканы быһа үлэлиир 210 куойкалаах,
ол иһигэр:
85 – искэннээх ыарыһахтарга,
35 – радиология отделениетын ыарыһахтарыгар,
17 – күнүс эмтэнээччилэргэ;
4 – сытар отделениелаах;
144 киһи поликлиникаҕа биир сменаҕа сылдьыаҕа.
Надежда ЕГОРОВА, «Саха сирэ» хаһыат, edersaas.ru