Эрдэ суруйбуппут курдук, Айсен Николаев өрөспүүбүлүкэтээҕи эмтиир тэрилтэлэри көрбүтүн түмүгэр искэни эмтиир диспансеры атын сиргэ көһөрөргө сорудахтаабыта. Ол курдук, диспансер саҥа киин тутуллан үлэҕэ киириэр диэри куораттааҕы клиническэй балыыһа акушерскай отделениетыгар көстө.
edersaas.ru
Диспансер кэлэктиибэ уонна эмтэнээччилэр бу сонуну үөрэ-көтө ылыннылар. “Биһиги сэтинньи 16 күнүттэн киэҥ-куоҥ, сырдык дьиэҕэ көһөн эрэрбититтэн олус үөрэбит. Билигин кэбиниэттэри, эмтиир тэриллэри, миэбэли хомуйуу, таҥыы үлэлэрэ бара тураллар. Малбытын-салбытын таһарбытыгар көмөлөспүт биһиги дьиэ кэргэттэрбит күүстээх аҥаардарыгар, оҕолорбутугар, аймахтарбытыгар, Дьокуускайдааҕы медицинскэй кэллиэс устудьуоннарыгар олус махтанабыт. Киэҥ-куоҥ кэбиниэттэрдээх уонна балааталардаах, таһаҕаһы уонна дьону тиэйэр лииптээх, киэҥ көрүдүөрдээх дьиэҕэ көспүппүтүн билиҥҥитэ итэҕэйэ да иликпит”, — диэн өрөспүүбүлүкэтээҕи диспансер кылаабынай бырааһын солбуйааччы Татьяна Николаева үөрүүтүн үллэһиннэ. Татьяна Николаева өрөспүүбүлүкэ баһылыга Айсен Николаевка, СӨ Доруобуйа харыстабылын министиэристибэтин уонна куораттааҕы клиническэй балыыһа салалталарыгар махталын биллэрдэ.
Татьяна Мигалкина, диспансерга 1985 сылтан үлэлиир быраас:
— Свердлов уулуссатын 3/2 турар уопсай дьиэҕэ 1989 с. көһөн кэлбиппит. Бу кэмтэн ыла сүүрбэттэн тахса сыл устата биһиэхэ табыгастаах дьиэҕэ көһөрбүтүн күүппүппүт. Мин биир идэлээхтэрим, чуолаан, эдэр хирурдарым тустарыгар үөрэбин. Кинилэр эргэ да дьиэҕэ, кыараҕас усулуобуйаҕа 2013 сылтан ыла үрдүк технологиялаах эпэрээссийэлэри оҥорон кэллилэр. Билигин кинилэр сайдалларыгар, идэлэрин өссө күүскэ баһылыылларыгар кыах бэрилиннэ”.
Дьокуускайдааҕы клиническэй балыыһа акушерскай отделениетыгар диспансер үс бастакы этээскэ уонна төрдүс, бэһис этээстэр сорох кэбиниэттэригэр олохсуйда. Бастакыга поликлиника, иккискэ -химиотерапия отделениета, үһүскэ — гинекология отделениета, стационарнай блок, төрдүс уонна бэһис этээстэргэ эпэрээссийэ блога уонна реанимация отделениета олохсуйаллара былааннанар.
Надежда ЕГОРОВА, edersaas.ru