Үөһээ Бүлүүгэ ыытыллар Олоҥхо ыһыаҕа Саха АССР төрүттэммитэ 100 сылыгар ананар. Автономияны турууласпыт Исидор Барахов дойдутугар Харбалаахха кини аатын сүгэр култуура-мусуой киинин тутуу бастакы сыбаайатын түһэриигэ улуу киһибит сиэннэрэ Андрей Ярославович Барахов, Людмила Ярославовна Раевская, хос сиэнэ Ярослав Барахов кыттыыны ылбыттара бу түгэн суолтатын өссө үрдэттэ.
Исидор Барахов соҕотох уолун Ярослав уола Андрей Ярославович эһэтин аатын үйэтитиигэ улахан үлэ ыытылларын бэлиэтээтэ, махтанна:
— Биһиги дьиэ кэргэммит эһэбитигэр улахан чиэс бэриллэн, кини аатын үйэтитиигэ өрөспүүбүлүкэ таһымыгар үлэ ыытылларыгар махтанабыт, киэн туттабыт. Мин Саха сиригэр ахсыс төгүлүн кэллим. 1992 сылтан саҕалаан, өрөспүүбүлүкэ бары бэрэсидьиэннэрэ болҕомтолорун ууран, эһэбит аатын үйэтитиигэ улахан үлэни ыыттылар. Үөһээ Бүлүү улууһун баһылыга Владимир Поскачиҥҥа тус махталбын тиэрдиэхпин баҕарабын. Биир дойдулаахтара умнубакка, кини аатыгар сүгүрүйэ, киэн тутта ааттыы сылдьалларыгар махтанабыт! Биһиги ону улаханнык сыаналыыбыт.
Оттон иккис сиэнэ Людмила Ярославовна кыра эрдэхтэринэ эбэлэрэ — Исидор Никифорович кэргэнэ уонна аҕалара Ярослав Исидорович олус долгуйа, киэн тутта кэпсииллэрин, истиҥ тапталларын кинилэргэ тиэрдибиттэрин туһунан ахтар. Аҕата хаайылларыгар Ярослав кыракый этэ.
— Биһиги дьиэ кэргэммит бары эһэбитинэн киэн туттабыт. Мин Саха сиригэр кэллэхпинэ, киэн туттуум өссө улаатар, мин манна дьиэбэр кэлбит курдук сананабын, оннук сылаас, үтүө эйгэҕэ киирэбин. Бүтүн саха норуота Исидор Барахов аата ааттанарын туһугар кыһаллан, элбэҕи оҥороруттан үөрэбит, долгуйабыт. Өрөспүүбүлүкэ 100 сыла — олус бэлиэ даата. Саха норуота үгэстэрин, чулуу дьонун үйэтитэр, илдьэ сылдьар буолан, өссө хас да сүүс сылын бэлиэтиэ диэн эрэллээхпин.
Саха сирин уонна Үөһээ Бүлүү олохтоохторо куруук олус сылаастык, истиҥник көрсөллөр, бу көннөрү көрүнньүккэ буолбакка, ис сүрэхтэн тахсара көстөр. Манна кэлбиппиттэн олус-олус үөрэбин. Өссө да кэлиэм дии саныыбын!
Аан бастаан Саха сиригэр кэлэн баран, олус сөхпүппүн өйдүүбүн. Тоҕо диэтэр, бастаан билбэт эрдэххэ, дьон табанан сылдьаллар диэн өйдөбүллээх этим. Манна илэ кэлэн көрдөххүнэ эрэ итэҕэйэр көстүүлэриҥ элбэхтэр. Олус элбэх күөллэр, кэтит да кэтит өрүстэр, күөх суугун тайҕа, кэрэ айылҕа дойдута диэм этэ. Мин кэллэҕим аайы үчүгэй өттүгэр уларыйыылар буолбуттарын бэлиэтии көрөбүн.
Барахов араспаанньатын сүгэ сылдьар хос сиэнэ Ярослав программист идэлээх, ньиэп-гаас бырамыысыланнаһыгар үлэлиир. Кини Саха сиригэр иккис кэлиитэ. 2013 сыллаахха оҕо сылдьан кэлэн баран, массыынанан айаннаабытын умнубат, ыһыах киэҥ далааһыннаахтык ыытыллыбытын олус сөхпүтүн, дьон сылаас сыһыанын үчүгэйдик саныыр. Бу бырабыыталыстыба кыттыылаах, мусуой-култуура киинин сыбаайата түһүүтүгэр маннык улахан тэрээһиҥҥэ бастакы сырыым диэн долгуйар.
Үөһээ Бүлүүттэн Ангелина Васильева, »Саха сирэ» хаһыат, edersaas.ru
Салгыы видео-устууга Исидор Барахов сиэнэ Андрей Ярославович Барахов уонна хос сиэнэ Ярослав Барахов эҕэрдэлэрин истиҥ.
Хаартыска: ааптар түһэриитэ.