Ис дьыала министиэристибэтин салалтата Кыргызстан делегациятын кытта көрүстэ
Бу дьыл кулун тутар 19 күнүн сарсыардатыгар Дьокуускай куоракка Кыргызстан Өрөспүүбүлүкэтиттэн делегацията көтөн кэлбитэ. Делегация састаабыгар Киргизия миграциятын бэрэссэдээтэлин солбуйааччы Самат Токтоболотов, Россияҕа Киргизия посольствотын сүбэһитэ Дастан Ниязалиев, Россияҕа Киргизия миграциятын бэрэстэбиитэлэ Жаркынай Галиева бааллар.
СӨ ИДьМ-тын пресс-сулууспата иһитиннэрбитинэн, ис дьыала миниистирэ, полиция генерал-майора Владимир Прокопенко бу оробуочай көрсүһүүгэ Кыргызстан төрүттээх киһи оҥорбут буруйун кытаанахтык сэмэлээбит:
— Биһиги элбэх омук түөлбэлээн олорор өрөспүүбүлүкэтэ буолабыт. Олохтоохтор ыалдьыттары куруук эйэҕэстик көрсөр үгэстээхтэр. Ол эрэн, ити үтүө өрүт кэлии омуктар сокуону кэһиилэригэр быраап биэрбэт. Хас биирдиилэрэ итинник сыһыаны сыаналыахтаах, саха норуотугар убаастабыллаахтык сыһыаннаһыахтаах, үгэстэрин, олохторун укулаатын убаастыахтаах. Уонна, биллэн турар, Россия сокуоннарын кэһиэ суохтаахтар. Саха сирин олохтооҕо бэйэтин өрөспүүбүлүкэтигэр куттала суохтук санана сылдьыахтаах.
Маны сэргэ, генерал бу ыар буруйу омуктар икки ардыларынааҕы иирсээҥҥэ тиэрдэр сатамматын бэлиэтээтэ. Кыргызстан бэрэстэбиитэллэригэр омуктар икки ардыларыгар сөбүлэһиини, сомоҕолоһууну, иллэһиини бөҕөргөтөргө кимиилээх үлэ ыыталларыгар ыҥырда.
— Миграннар оҥорор бары буруйдара ураты хонтуруолга сылдьаллар, сылдьыахтара даҕаны. Ол туһунан дьаһаллар полиция бары салааларыгар бэрилиннилэр. Надзорнай уорганнары кытары эбии бэрэбиэркэлэр ыытыллаллар — миграционнай сокуон, сокуоннайа суох предпринимательство, дьону таһыы эйгэлэригэр, — диэн Владимир Прокопенко түмүккэ бэлиэтээтэ.
Манна даҕатан эттэххэ, FOR.kg иһитиннэрбитинэн, Киргизия омуктар дьыалаларыгар министиэристибэтэ биир дойдулаахтара оҥорбут буруйун кытаанахтык сэмэлээбит.
Итиэннэ силиэстийэ объективнайдык барарыгар эрэнэрин биллэрбит, Саха сиригэр олорор Киргизия сокуону тутуһар миграннарыгар туһааннаах уорганнар куттал суоһаабатын курдук хааччыйалларыгар көрдөспүт.
Вера Макарова, «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата.