Билиҥҥи ыччат аан дойду араас муннугар үөрэнэ, олохсуйа барар буолла. Биһиги Ирландия Өрөспүүбүлүкэтин Дублин куоратыгар олорор биир туспа суоллаах-иистээх Хаҥаластан төрүттээх (@saydyy_kuo_fedorova) Сайдыы Куо Фёдорованы кытары кэпсэттибит. Сайдыы Куо хомусчут, Ирландияҕа «UDAGAN» диэн бөлөхтөөх.
Хас сыллаахтан тас дойдуга олороҕун? Тугунан дьарыктанаҕын?
— Тас дойдуга олорбутум 4 сыла буолла. 2014 сыллаахха турок тылын үөрэтэ Анкара куоракка аспирантураҕа киирбитим. Үөрэнэр кэммэр Россияны кытта Турция сыһыана кытааппыта, сэрэхтээх буолбута. Ол иһин кэргэммэр Великобританияҕа көспүтүм. Биир сыл Англияҕа олорбуппут, онтон Ирландияҕа олохсуйдубут. Кэргэним Оскар Сауз аныгылыы муусуканы толорор, композитор идэлээх. Кэргэмминиин «Айархаан» этно-бөлөҕү кытары Европа куораттарынан гастроллуу сылдьан 2011 сыллаахха Великобританияҕа билсибиппит. Билигин иккиэн «UDAGAN» диэн бөлөхтөөхпүт. Дублиҥҥа көһүөхпүтүттэн биир бастыҥ престижнай колледж-университет бырапыассардарынаан үлэлэһэбит. Бөлөхпүтүнэн улахан ситиһиибит диэн, от ыйыгар аан дойдутааҕы “INSPIREfest-2017” диэн билим, технология уонна инновация фестивалыгар кыттыыбыт буолар. Бу фестивальга аан дойдуга саамай сүдү суолталаах хампаанньалар салайааччылара, учредителлэрэ кэлэр кэм туһунан кэпсэтэллэр. Facebook, Google, Airbnb, Silicon Republic, Dropbox курдук улахан хампаанньалар салайааччыларын иннигэр саха култууратын көрдөрбүппүнэн киэн туттабын. Билигин «Хомус и мой Мир» диэн 2011 сыллаахха таһаарбыт кинигэбин кэргэмминиин английскайдыы тылбаастыы сылдьабыт.
Сайдыы Куо диэн пааспаргар суруллар аатыҥ дуо? Тоҕо Сайдыы Куо диэн ааты ылбыккыный?
—Оҕо сылдьан ааппын умнар идэлээх этим уонна хайдах эрэ атыҥырыырым. Устудьуоннуур сылларбар ааппын Сайдыы Куо диэҥҥэ уларыппытым, «айар-тутар, сайдар» диэн дириҥ суолталаах. Ааппын сөбүлүүбүн уонна олохпор туһалыыр диэн итэҕэйэбин.
Саха култууратын атын омуктарга тоҕо тарҕатарга сананныҥ уонна омуктар хайдах ылыналлар эбитий?
—Бэйэбин өйдүүр эрдэхпиттэн төрөөбүт норуотум баай култууратын уонна нэһилиэстибэтин интэриэһиргээн үөрэтэбин. Биһиги сахалар ураты уонна баай култуураны илдьэ сылдьарбытын атын омук дьоно өйдүүрүн туһугар кыһаллабын. Кинилэр биһиги култуурабытын, тылбытын, таҥаспытын көрөн-истэн соһуйаллар уонна интэриэһиргииллэр. Ордук хомуска оонньууну сэҥээрэллэр, иэйии ылаллар.
Сайдыы Куо уонна Оскар Сауз “INSPIREfest-2017” фестивальга кэнсиэртэрин кэтэһэн олороллор
Кэнсиэр түгэннэрэ
Билим, технология уонна инновация фестивалын кыттыылаахтарын кытта
Анастасия АЛЕКСЕЕВА, «Саха Сирэ» хаһыат, edersaas.ru