Ил Дархан Айсен Николаев Петербурдааҕы норуоттар икки ардыларынааҕы экэнэмиичэскэй пуорум Губернатордарын кулуубугар дойду илин диэки хайыспыт кэмигэр Саха сирин сайдыытын туһунан кэпсээтэ.
—Кэнники 5 ый иһигэр бырамыысыласка үүнүү 11,3%-ҥа тэҥнэстэ (2021 сылы кытары тэҥнээтэххэ). Былырыыҥҥы сыл онто да суох үрдүк көрдөрүүлээх этэ. Сүрүн хапытаалга инвестициялар 30% үрдээтилэр. Сир баайын хостооһун эмиэ үрдээн иһэр, холобур, гааһы хостооһун 35% үрдээтэ. Онон, өрөспүүбүлүкэ Илиҥҥи Сибиир уонна Уһук Илин икки ардыгар баарынан, илиҥҥи дойдуларга тырааныспар инфраструктуратын сайыннарарга тоҕоостоох кэм. Мииринэйинэн, Дьокуускайынан кэлэн ааһар, Охотскай муораҕа тиийэр Иркутскай-Магадан федеральнай суолу тутуу боппуруоһа сытыытык турар. Ол туһуттан, бастатан туран, Өлүөнэ муостатын тутуохха наада, — диэн кини эттэ.
Губернатордар кулууптарыгар кэпсэтии «Регионы – локомотивы новых возможностей» диэн тиэмэлээх ыытылынна. Социальнай чинчийиилэри ыытар эспиэрдэр институттара уонна Росконгресс пуондата тэрийэн ыыттылар.
Манна Забайкальскай кыраай губернатора Александр Осипов, Мурманскай уобаластан Андрей Чибис, Тюменскай уобаластан Александр Моор, Амурскай уобаластан Василий Орлов, Чувашия Өрөспүүбүлүкэтиттэн Олег Николаев, Севастопольтан Михаил Развожаев, Иркутскай уобаластан Игорь Кобзев, врио губернатордар э.т. толорооччулар – Тамбовскай уобаластан Максим Егоров, Ярославскай уобаластан Михаил Евраев кытыннылар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.