Ирина Сивцева: «Оҕом киэҥ-куоҥ, тупсаҕай тутуулаах оскуолаҕа үөрэниэн баҕарабын»
Өрөспүүбүлүкэ салалтата «ВИС» хампаанньаны кытта сөбүлэһии түһэрсэн, Дьокуускай куоракка былырыын-быйыл икки ардыгар 12 култуура, үөрэх тэрилтэлэрэ дьиэнэн хааччылыннылар.
Сөбүлэһиини Айсен Николаев Дьокуускай баһылыга эрдэҕинэ түһэрсибиттэрэ. Манна кэлэр сылларга «ВИС» тэрилтэ көмөтүнэн Дьокуускайга уһуйааннар, оскуолалар, култуура эбийиэктэрэ тутуллуохтара диэн кэпсэтии барбыта.
Биир маннык тутуунан Дьокуускайга 203-с микро-оройуоҥҥа баар «Айыы кыһата» оскуола буолар. Тутуу биир сыл курдук эрдэ тутуллан, 2018 сыл бүтүүтэ үлэҕэ киирбитэ.
Ирина Сивцева, Дьокуускай 203-с микро-оройуонун олохтооҕо:
— Мин «Айыы кыһата» оскуола саҥа дьиэтэ 203-с микро-оройуоҥҥа тутулларын истэммин, манна дьиэ атыыласпыппыт. Оҕолорум сахалыы тыыннаах оскуолаҕа үөрэниэхтээхтэр диэн санааны тутуһабын. Оскуолабыт тутулла оҕуста. Уолум аны икки сылынан бу оскуолаҕа үөрэнэ киириэҕэ диэн эрэнэбин. Саҥа, киэҥ-куоҥ, тупсаҕай тутуулаах, оҕо сайдарыгар туга барыта баар оскуолаҕа ама ким оҕотун үөрэттэрин баҕарыа суоҕай?! Сонуннарга оскуола кылаастарын иһин көрбүтүм, интерактивнай дуоска арааһа, быһатын эттэххэ, үөрэх аныгы ирдэбилигэр толору эппиэттиир эбит.
«Айыы кыһатын» «ВИС» тэрилтэ туппута диэн билэбин. Бу тэрилтэ аны биһиги оройуоммутугар уһуйааннары тутта. Бара-кэлэ тутуулары тастан көрдөххө, кырдьык, хапытаалынайдык, үйэлээхтик тутулуннулар.
edersaas.ru
Хаартыска — СИА.