“Бу да иннинээҕи сылларга оҕо төрөөбүт дойдутун устуоруйатын билиэхтээх” — диэн үгүстүк этиллэрэ. Бүгүҥҥү буола турар бэлиитикэ боппуруоһунан сибээстээн тустаах боппуруоска балачча тохтуур, ырытар буоллулар, оннооҕор математиканы, нуучча тылын сэргэ үһүс булгуччулаах биридимиэтинэн киллэриэххэ диэн туруорсааччылар кытта бааллар. Миниистир пресс-кэмпириэнсийэтигэр ити туһунан ыйытыыга хоруйдаата.
СӨ үөрэҕин уонна билимин миниистирэ Ирина Любимова: “Устуоруйаны бары билиэхтээхпит. Биир кэмҥэ омук тыла булгуччулаах биридимиэт быһыытынан киириэхтээх диэн эмиэ этэ сылдьыбыттара. Омук тылын билэр киһиэхэ – суол ханна баҕарар аһаҕас. Манна бэлэмнэниэхтээхпит. Билигин эксээмэҥҥэ омук тылын талар оҕо аҕыйах, бэлэмэ суохпут. Онон оскуолаҕа манна эмиэ болҕомто ууруллара эрэйиллэр. Дьиҥэр, биһиги оҕолорбут инники сылдьаллар. Булгуччулаах биридимиэккэ киллэриэххэ диэтэхтэринэ, оҕолор бэйэлэрэ бэлэм буолуохтара.
Устуоруйа диэн тугуй? Устуоруйа уустук биридимиэт, кырдьыктаах буолуохтаах. Биһиги оҕоҕо кырдьыгы кэпсиэхтээхпит. Соторутааҕыта федеральнай мунньахха үөрэҕирии миниистирэ Сергей Кравцов Украина устуоруйаҕа үөрэҕин кинигэтин ырытан көрбүттэрин эттэ – Арассыыйа, ону ааһан Украина бэйэтин устуоруйатын эмиэ букатын атыннык сырдатыллыбыт.
Мин санаабар, устуоруйа биридимиэтин булгуччулаах эксээмэннэр ахсааннарыгар киллэрэр арыый эрдэ буолуо. Хас да булгуччулаах биридимиэти киллэрии оҕоҕо ноҕоруускалаах”, — диэн эттэ.
Людмила ПОПОВА, «Саха сирэ» хаһыат, edersaas.ru
Хаартыска: СИА