Маны аах Үөрэх уонна наука

Ирина Любимова: “Үөрэх барыллаан былаанын бырайыага ыллыктаах быһаарыыны эрэйэр”

Бу күннэргэ Дьокуускайга РФ Үөрэҕириигэ министиэристибэтин бэрэстэбиитэллэрэ —  Судаарыстыбаннай бэлиитикэ уонна уопсай үөрэхтээһин эйгэтин салайыыга департаменын дириэктэрин солбуйааччы Анна Тимофеева,  Арассыыйатааҕы үөрэх академиятын үөрэҕи сайыннарар стратегия институтун дириэктэрин эбээһинэһин толорооччу Татьяна Суханова кэлэн үлэлии сылдьаллар.

СӨ үөрэҕин уонна билимин миниистирэ Ирина Любимованы кытта дьыалабыай көрсүһүү буолла. Дойду министиэристибэтин бэрэстэбиитэллэрэ төрөөбүт тылынан үөрэтэр оскуолаларга анаан оҥоһуллубут үөрэх барыллаан былаанын бырайыагын билиһиннэрдилэр. Төрөөбүт тыллары үөрэтэргэ чааһын ыйан туран үөрэх барыллаан былаанын бырайыагын ырытыстылар.

Ирина Павловна үөрэх барыллаан былаанын оҥорууга, өрөспүүбүлүкэ төрөөбүт тылын учууталларын санаалара булгуччу учуоттаныаҕа диэн бэлиэтээн эттэ: “Биһиэхэ төрөөбүт тыллары чөл хаалларар уонна үөрэтэр соруктаах судаарыстыбаннай бырагыраама үлэлиир. Былырыын төрөөбүт тыллар порталларын үлэтин саҕалаабыппыт. Төрөөбүт тыл бары учууталларыгар уонна төрөппүттэргэ үчүгэй тирэҕинэн буоларыгар эрэнэбит. Бу билиһиннэриллибит төрөөбүт тыллаах оскуолаларга үөрэх барыллаан былаанын бырайыага төрөөбүт тыллары үөрэтии боппуруоһунан ыллыктаах быһаарыылары эрэйэр. Педагогтарга быһаарыахпыт уонна үөрэх барыллаан былаанын оҥорууга кыттааччылар санааларын учуоттуохпут”.

Дьыалабыай көрсүһүүгэ Уопсай үөрэхтээһин, иитии уонна эбии үөрэхтээһин эйгэтигэр судаарыстыбаннай бэлиитикэ департаменын салайааччыта Лена Тен уонна С.Н. Донской-II аатынан Үөрэҕи сайыннарар уонна учууталлар идэлэрин таһымын үрдэтэр институт дириэктэрэ Ньургун Павлов кытыннылар. Институт дириэктэрэ төрөөбүт тыллар порталларын, чуолаан виртуальнай лаборатория уонна конструктор үлэтин туһунан иһитиннэрдэ. Федеральнай экспиэртэргэ сыл устата барбыт мэтэдиическэй сүбэлэр уонна сэминээрдэр иһин махталын биллэрдэ.

Ону тэҥэ, СӨ Үөрэҕин уонна билимин министиэристибэтин бэрэстэбиитэллэрэ федеральнай исписэлиистэртэн быйыл уонна 2023 сылга оскуола үөрэҕин систиэмэтин саҥардыы бырагырааматыгар кыттар оскуолалар – оскуолаларга хапытаалынай өрөмүөнү ыытар киэҥ бырагыраамаҕа хабыллар оскуолалар учууталларын идэлэрин таһымын үрдэтиини тэрийиигэ итиэннэ оскуолалары үөрэх литэрэтиирэтинэн хааччыйыыга быһаарыылары, сүбэлэри ыллылар.

СӨ Үөрэҕин уонна билимин министиэристибэтин пресс-сулууспата.

1
0
Telegram @edersaas20