Ирина Конакова: «Саха сиригэр 18.00 чааска 331 035 киһи куоластаата»

Киин быыбардыыр хамыыһыйа бэрэссэдээтэлин солбуйааччы Ирина Конакова от ыйын 1 күнүгэр, киэһээ 18.30 чааска, быһа сибээскэ таҕыста. Кини бу кэмҥэ Саха сирин сорох сирдэригэр быыбар түмүктэнэн, куоластары ааҕыы саҕаламмытын бэлиэтээтэ.

— Куоластааһын бүтэрэ чаастан эрэ ордук хаалла. Оттон сорох хотугу улуустарга, хайыы-үйэҕэ, түмүктэннэ. Бу кэмҥэ куоластааһын тэтимэ куһаҕана суох диэхпин баҕарабын. Эрдэ ааҕан көрүү түмүгүнэн, өрөспүүбүлүкэбит үрдүнэн 331 035 быыбардааччы куоластаабыт. Ол аата, уопсайа 50,4% куоластыыр бырааптаах гражданнар бэйэлэрин санааларын биллэрбиттэр. Саамай үрдүк көрдөрүүлээҕинэн Өлөөн улууһа буолар. Манна 90% -тан тахса киһи кыттыыны ылла. Үчүгэй көрдөрүүлэри Анаабыр уонна Үөһээ Бүлүү улуустара биэрдилэр. Бу кэмҥэ ити улуустарга 85% -тан тахса куоластааччы бүлүтүөннэрин толорбуттар.  Уопсайынан, тыа сиригэр куоластааһын көхтөөхтүк бара турар диэххэ наада. Дьокуускай куорат билиҥҥи туругунан — 41% . 

Бу куоластааһын коронавирус дьаҥын утары охсуһуу кэмигэр ыытыллар буолан, уустук, араас мэһэйдэри көрсүбүт тэрээһин буолла. Ол да буоллар, дьон дойду Төрүт Сокуонугар уларытыылары киллэрии сүдү суолталаах буоларын өйдөөн, көхтөөхтүк кытынна. Хаалбыт бириэмэҕэ дьон өссө да куоластаан, санааларын биллэриэхтэрэ диэн эрэнэбин.