Бу күннэргэ СӨ үпкэ министиэристибэтэ муниципальнай уонна судаарыстыбаннай тэрилтэлэр кылаабынай буҕаалтырдарыгар анаан өрөспүүбүлүкэтээҕи сүбэ мунньах тэрийэн ыытар. Бу тэрээһиҥҥэ уопсайа 200 тахса буҕаалтырдар уонна үп үлэһиттэрэ кыттыыны ылаллар диэн иһитиннэрэр министиэристибэ пресс-сэкирэтээрэ Анна Чусовская.
edersaas.ru
Семинар сүрүн сыала-соруга: үп-харчы эйгэтин үлэһиттэригэр 2019 сыл түмүгүнэн отчуот оҥороллоругар федеральнай сокуоҥҥа киирбит уларыйыылары билиһиннэрии.
Кинилэр отчуоттарын түмүгэ дойду социальнай-экэнэмиичэскэй сайдыытын көрдөрөр. Манна тирэҕирэн, Арассыыйа таһымыгар Үп министиэристибэтэ быйыл отчуоту оҥорорго элбэх уларыйыылары киллэрдэ. Отчуот төһө үп тоҕо, хайдах, хаһан, ханна туттуллубутун, анаммытын барытын аһаҕастык көрдөрөрө ирдэнэр.
Судаарыстыба үбэ сөптөөхтүк тыырылларын, хааһына харчыта ханнык хайысхаларга хайдах туттуллубутун, үлэ таһымын ырытан көрөргө, отчуоттуурга саҥа федеральнай ирдэбил киирдэ.
Буҕаалтырдар бачча харчы онно барда диэн судургутук буолбакка тустаах бырайыактар туох сыаллаахтарын арыйан, дьон-сэргэ олоҕун тупсарар дуу, эбэтэр харчы атын хайысхаҕа ананара ордук буолуо дуу диэн киэҥник ырытан көрүөхтээхтэр.
Холобур, национальнай бырайыактарга көрүллүбүт үтүмэннээх үп тус сыалыгар хайдах туттуллубутун, үлэ хаачыстыбатын ырытыахтара.
“Хас биирдии киһи күн аайы бүддьүөт эйгэтин кытта алтыһар. Аны билигин төһө харчы ороскуоттаммытын эрэ буолбакка, ыытыллыбыт үлэ түмүгэ учуоттанар уонна отчуоттанар буолла. Холобур, национальнай бырайыак чэрчитинэн, төһө харчы ороскуоттаммыта эрэ буолбакка, хас эбийиэк үлэҕэ киирбитин, хас килэмиэтир уһуннаах суол оҥоһуллубутун барытын сырдатыахтара.
Ону учуоттуурга дойду үрдүнэн Үп министиэристибэтэ саҥа федеральнай ирдэбил киллэрбитин билиһиннэрээри семинар ыыта сылдьабыт. Хас биирдии улуустан үп-харчы үлэһиттэрэ кэлэн, мунаарар ыйытыктарыгар хоруй ылан, семинарбыт буҕаалтырдар үлэлэригэр көдьүүстээх буолуоҕа”, — диэн кэпсиир СӨ Үбүн миниистирин солбуйааччы Октябрина Никонова.
«Саха сирэ», edersaas.ru