Ирбэт тоҥ усулуобуйатыгар Саха сиригэр түөрт балаһалаах бастакы суолу 2023 сылга диэри тутуохтара
Ирбэт тоҥ усулуобуйатыгар оҥоһуллубут Саха сиригэр түөрт балаһалаах аан бастакы суолу “Куттала суох уонна хаачыстыбалаах массыына суола” национальнай бырайыагынан 2023 сылга тутуохтара. Бу туһунан ТАССка СӨ Массыына суолун управлениетын генеральнай дириэктэрэ Семен Филиппов иһитиннэрбит.
edersaas.ru
“Быйыл Дьокуускайга “Нам” массыына суолун уларытан оҥорууну (реконструкция) саҕалааһыны былаанныыбыт. Суол, төрүт бырааһынньыкпыт ыытыллар “Үс Хатыҥ” сиригэр тиэрдэр. Үксүн айаҥҥа кэлэ-бара (массыына элбэҕинэн) биэс-алта чаас барар. Чопчу бу учаастакка үлэни саҕалыыр былааннаахпыт. Бу Саха сиригэр ирбэт тоҥ усулуобуйатыгар иккис категориялаах оҥоһуллар түөрт балаһалаах аан бастакы суол буолуоҕа”, — диэн Семен Филиппов эттэ.
Суол уһуна – 7,1 килэмиэтир. Национальнай бырайыагы олоххо киллэриигэ, үлэ бары түһүмэҕэр, 2021-2023 сылларга, 1,5 миллиард солкуобайы көрөр былааннаахтар. “Бу 2023 сылга үлэҕэ киириэхтээх суолталаах эбийиэк буолар. Ону тэҥэ, элбэх хайысхалааҕынан, үгүс сырыылааҕынан уратылаах”, — диэн салайааччы эбэн этэр.
Национальнай бырайыак иитинэн 2021 сылга 13,9 килэмиэтир уулуссаны сырдатыы, 24 миэтэрэ хааччахтыыр күрүөлээһини (барьерное ограждение) уонна 2,5 тыһыынча суол бэлиэтин туруорар толкуйдаахтар. Быйыл уонна эһиил национальнай бырайыагынан “Умнас” уонна “Амма” суолларыгар ыйааһыны уонна кээмэйи (весовой и габаритный) хонтуруоллуур икки автоматическай пууну туруохтара.
РФ бэрэсидьиэнэ Владимир Путин көҕүлээһининэн киирбит “Куттала суох уонна хаачыстыбалаах массыына суола” национальнай бырайыак дойду 83 субъегар ситимниир, түмэр суолталаах (агломерация) 104 куораты хабыаҕа.
Бырайыагы олоххо киллэрии иитинэн, 2024 сылга (2017 сылы кытта тэҥнээн көрдөххө), нормативнай туруктаах эрэгийиэннээҕи массыына суолун өлүүтэ 43,1 бырыһыантан 50,9 бырыһыаҥҥа диэри үрдүөхтээх. Суол саахала тахсар миэстэтин 50 бырыһыанын суох гынар ирдэнэр. Куорат ситимниир, түмэр суолталаах (агломерация) суолларын уһунун өлүүтүн норма туругар диэри икки төгүл (85 % диэри) үрдэтэр уонна федеральнай, эрэгийиэннээҕи трассалар ноҕоруускаларын өлүүтүн 10 бырыһыаҥҥа диэри намтатар ирдэрэн.
Хаартыска: Андрей СОРОКИН (СИА)