6,5 %-наах чэпчэтиилээх ипотека бырагыраамата 2021 сыл сайыныгар диэри уһаата

РФ Бырабыыталыстыбата чэпчэтиилээх ипотека бырагырааматын 2021 сыл от ыйын 1 күнүгэр диэри уһатта. Бу туһунан уураах бүгүн, сэтинньи 5 күнүгэр, олоххо киирдэ.

Чэпчэтиилээх ипотеканы саҥа тутуллубут дьиэҕэ кыбартыыра атыылаһар буоллахха туһаныллар. Москва, Санкт-Петербург, итиэннэ Московскай уонна Ленинградскай уобалас олохтоохторугар 12 мөлүйүөн солкуобайга диэри кирэдьиит бэриллиэн сөп. Оттон атын эрэгийиэннэргэ — 6 мөлүйүөҥҥэ диэри.

Бырагыраама усулуобуйатынан, бастакы төлөбүр кыбартыыра сыанатын 15 %-ыттан итэҕэһэ суохха суумаҕа тэҥнэһиэхтээх. 6,5 % чэпчэтиилээх ставка уонна баан ырыынагын араастаһыытын судаарыстыба толуйар.

«Парламентская газета» саайтан.