Үстэн элбэх оҕолоох ыалларга ипотекаларыттан көҕүрэтэргэ 450 тыһыынча солкуобайы биэриэхтэрэ. Бу туһунан сокуон Госдуумаҕа бүтэһик ааҕыытын ааста. Аны Федерация Сэбиэтигэр уонна бэрэсидьиэҥҥэ бигэргэтиллэрэ хаалла.
Бу иннинэ Владимир Путин элбэх оҕолоох ыалларга ипотека бырыһыанын 6%-ҥа диэри кыччатар уонна ипотекаттан көҕүрэтэргэ 450 тыһ. солк. биэрэр туһунан этии киллэрбитэ. Ол олоххо киириэх курдук буолла.
Бу төлөбүр Дом.РФ портал нөҥүө бэриллэр буолуо. 2019-2022 сылларга үһүс уонна онтон кэлэр оҕолорун төрөппүт (иитэ ылбыт) дьиэ кэргэттэр бу сууманан саҥардыы, эбэтэр урут ылбыт ипотекаларын көҕүрэтэр бырааптаахтар. Дьиэ кэргэн дохуотун кээмэйэ оруола суох. Оттон төрөппүт буолар бырааптара быстыбыт дьон, эбэтэр оҕону иитэ ылыы сатамматаҕына, бу төлөбүрү ылбаттар.
Ипотека сууматыттан көҕүрэтэргэ Ийэ хапытаалын эмиэ тэҥҥэ туһаныахха сөп, оччоҕо 900 тыһ. солкуобайынан көҕүрүүр кыахатанар. Бу сууманы ипотека бырыһыанын кытта аахтахха, баһаам көҕүрээһин, дьиэ кэргэҥҥэ улахан көмө буолар. Бэлиэтээн эттэххэ, ипотека ый аайы төлөнөр сууматын буолбакка, болдьоҕун (сылын) көҕүрэтии быдан барыстаах буолар.
Бу төлөбүрү киһи олоҕор биирдэ эрэ ылар бырааптаах. Ханнык докумуоннары ирдииллэрий?
Бастаан бааҥҥа сайабылыанньа суруллар. Онно оҕо төрөөбүтүн туһунан сибиэдиэтэлистибэни, ипотека дуогабарын, төһө иэс хаалбытын туһунан ыспыраапканы, дьиэ докумуоннарын, оҕолорго дьиэ өлүүтүн биэрэр туһунан нотариуска бигэргэммит эбэһээтэлистибэни уонна счет реквизиттэрин туттараллар.
Баан бу докумуоннары «ДОМ.РФ» биэрэр. Оператор бэрэбиэркэлээн баран, биэрэр-биэрбэт туһунан быһаарыы таһаарар. Өскөтүн ипотекаттан хаалбыт иэс 450 тыһ. солкуобайтан кыра буоллаҕына, кирэдьиит бырыһыанын соторго ыыталлар.
РФ бырабыыталыстыбата 2019 сылга бу бырагырааманы үбүлүүргэ 20 млрд тахса солк. көрөр былааннаах. Үбүлээһин сыл аайы эбиллэн иһиэхтээх. Бырагыраама биһирэннэҕинэ, үс сылтан уһатан биэриэхтэрин сөп.
Ыспыраапка
«Дом.РФ» ААУо – бу олорор дьиэ усулуобуйатын таһыма үрдүүрүгэр, сыаната чэпчииригэр туһуламмыт судаарыстыбаннай көҕүлээһиннэри олоххо киллэрэр хампаанньа. Ол эбэтэр аахсыйаларын судаарыстыба толору бас билэр.
Ангелина ВАСИЛЬЕВА, “Саха сирэ” хаһыат, edersaas.ru