Бу күннэргэ СӨ Инвестицияҕа уонна предпринимательствоҕа министиэристибэтэ ааспыт сыллааҕы үлэтин түмүгүн таһаарда.
edersaas.ru
Ол курдук инвестиция кээмэйэ 2017 сылга быһа холуйан 360,3 млрд солк. тэҥнэстэ. Ол эбэтэр көрдөрүү 2016 сыллааҕар 127,8% үрдээтэ. Министиэристибэ пресс-сулууспата иһитиннэрбитинэн, инвестиция сүрүн кээмэйэ — 70% нефть уонна гаас салааларыттан киирэр. Бөдөҥ инвестбырайыактары олоххо киллэрии үлэ саҥа миэстэтин арыйыыга, муниципальнай уонна өрөспүүбүлүкэтээҕи бюджеттар дохуоттарын чааһын үрдэтиигэ туһуланыаҕа.
Биллэн турар, инвестицияттан киирбит үп социальнай эйгэҕэ эмиэ араарыллыаҕа. Ол курдук, судаарыстыбаннай уонна чааһынай сөбүлэҥҥэ олоҕуран. өрөспүүбүлүкэҕэ 1188 миэстэлээх 7 оҕо саада тутулунна. 15 уһуйаан тутулла турар.
Саха сирэ кэлиҥҥи сылларга Уһук Илин регионугар инвестицияны бэйэҕэ тардыыга инники күөҥҥэ иһэр. 2017 с. ахсынньыга буолбут сылы түмүктүүр мунньахха Владимир Путин Саха сирэ инвестицияны тардыы көрдөрүүтүнэн 10 бастыҥ субъект ахсааныгар киирбитин холобурдаабыта.
Бырабыытылыстыба чилиэннэрин, үөһээҥҥи салалта эппиэттээх салайааччыларын кытта сыллааҕы үлэ түмүгүн таһаарар мунньахха Ил Дархан Егор Борисов:
— Кэлэр сылларга инвестиция хайысхатын сайыннарыыга ылыллыбыт тэтими өссө күүһүрдэн, бу салааҕа сонун сүүрэннэри тобулууга кэккэ соруктары туруоран үлэлиэххэ наада, — диэн бэлиэтээбитэ.
2013-2017 сылларга Саха сиригэр 1,2 триллион солк. инвестиция нөҥүө киирбитэ. Онон быйылгы сылтан инвестицияны тардыыга саҥа тосхоллору торумнуур сорук турар.
Елена ПОТОЦКАЯ, «Саха сирэ», edersaas.ru