Кэлиҥҥи кэмҥэ Инвестиция уонна урбаан миниистирэ Антон Сафронов социальнай ситимнэр (фейсбук уонна инстаграм) нөҥүө күннээҕи үлэтин билиһиннэрэр буолла.
Бу сонун көрүҥ ордук биһиэхэ, суруналыыстарга, табыгастаах диэххэ сөп. Бастатан туран, күн аайы миниистир күннээҕи үлэтин билиһиннэрэр кыах суох. Иккиһинэн, Антон Сафроновтыын санаатаҕыҥ аайы командировкаларга сылдьыбаккын. Үсүһүнэн, үөрэнэн хаалбычча, күннээҕинэн «буруолуу» сылдьар сонуну кэтэһэҕин. Онон социальнай ситимнэргэ тахсыбыты «Эдэр саас» сайт нөҥүө батсаабынан туһанар тыа сирин олохтоохторугар үөрэ-көтө тиэрдэр буоллахпыт.
— Министиэристибэ үлэһиттэрин сүрүн сорукпут – муниципальнай тэриллиилэри кытта бииргэ үлэлээһин. Ол иһин тыа сириттэн кэлэр баһылыктарга, олохтоох бородууксуйаны, араас өҥөнү оҥорорго ылсан үлэлиир урбаанньыттарга ааммыт өрүү аһаҕас, — диэн суруйар Антон Сафронов.
Дьэ, онон ааспыт нэдиэлэ биир күнэ — сэрэдэ урбаан миниистиригэр хайдах ааспытын туһунан билсиэҕиҥ.
— Күн бастакы аҥарыгар Чурапчы улууһун Алаҕар нэһилиэгин баһылыга Ньургун Попову кытта көрүстүм. Чыаппараҕа 750 киһи олорор, сирэ—уота Мэҥэ Хаҥалас улууһун кытта ыаллыы сытар. Баһылык олохтоох урбаанньыттар үүт аһы астыыр сыаҕы аһыахтарын баҕаралларын туһунан санаатын үллэһиннэ. Онуоха сөптөөх тэрили буллахха, министиэристибэттэн туох өйөбүл баарын ыйыталаста. Бородууксуйа хамаҕатык барыаҕар баһылык эрэнэр. Суол—иис өттүнэн чыаппаралар олох эрэйдэммэттэр эбит. Ордубут бородууксуйаларын Бахсы, Нуораҕана маҕаһыыннарыгар илдьэн батарыахтарын сөп. Чыаппара баһылыга бэлиэтииринэн, өссө биир кэскиллээх хайысха – тимир уһаарыыта. Бу салааҕа ылсан үлэлиэх дьон эмиэ бааллар эбит. Ньургун Петровичтыын кэккэ боппуруостарга санаабыт биир буолан, бэрт олохтоохтук кэпсэттибит, — диэн санаатын үллэстэр миниистир.
Алаҕар нэһилиэгин баһылыга Ньургун Попов урбаан миниистирин кытта кэпсэтэн баран туох санааҕа кэлбитин ыйыталастым. Онуоха Ньургун Петрович түмүк толкуйун маннык тиэртэ:
— Чыаппара нэһилиэгэ сирэ—уота кыараҕаһа сүрдээх. Онон сүөһү ииттэргэ уустуктардаах. Урбаанньыттар сүөһү ииттэн, үүт ас көрүҥүн астыыр сыаҕы аһыахтарын баҕараллар. Ол эрэ буолуо дуо, атын да хайысханан бэйэ дьыалатын эмиэ сайыннарыахха сөп. Онон кэккэ толкуйдарбын Антон Сафроновы кытта анаан ырытыстым. Миниистир тыа сиригэр олохтоох боордууксуйаны элбэтиигэ улахан болҕомтотун уурарын биһирии ылынным. Кини миэхэ бэрт элбэх сүбэни—аманы биэрдэ.
Чыаппара баһылыгын кытта кэпсэтэн баран, эбиэт кэнниттэн миниистир Мэҥэ Хаҥалас улууһун Майа селотун баһылыга Дмитрий Тихоновтыын көрсүбүт. Баһылыгы кытта кытта урбаанньыт Прокопий Андреев кэлбит. Кини 2013 сылтан арболит блоктары уонна монолитнай бетону оҥорор эбит.
— Собуот сылга 15 тыһ. блогу уонна 200 кууб монолиты оҥорон таһаарар. 2017 сыллаахха урбаанньыт элбэх кыбартыыралаах дьиэни уонна пиэрмэни тутуу матырыйаалларынан хааччыйбыт. Кылгас сайын устата урбаанньыт ылыммыт былааныттан элбэҕи оҥорон таһаарар кыаҕа суох эбит. Былырыын Прокопий муниципальнай куонкуруска кыайан, быйыл улуустааҕы дьаһалта өйөбүлүнэн туһаныаҕа. Ылбыт үбүнэн урбаанньыт тутуу матырыйаалын куурдар тэрили атыылаһар былааннаах. Оччотугар оҥорон таһаарыытын кээмэйэ икки бүк үрдүө эбит. Ону таһынан, Прокопий Андреев бэлиэтииринэн эбии 10 үлэ миэстэтэ тахсыан сөп, — диэн фейсбукка суруйар Антон Сафронов.
Улуустартан кэлэр баһылыктары, урбаанньыттары атах тэпсэн олорон кэпсэтэр көдьүүстээҕэ чахчы. Миэстэтигэр туох үлэ бара турара дьэҥкэтик көстөр буоллаҕа. Ону таһынан урбаанньыттарга туох өйөбүл баарын, өссө ханнык кэскиллээх бырайыактары тобулуохха сөбүн туһунан кэпсэтии, биллэн турар, олоҕу хамсатара чахчы. Онон миниистир түбүктээх үлэтин быыһыгар «Тыа сирин чааһын» олохтообута икки өттүттэн – кэпсэтэ, сүбэлэһэ киирээччигэ да, салайааччыга бэйэтигэр да олус туһалааҕа биллэр.
Елена ПОТОЦКАЯ, «Саха сирэ» хаһыат, edersaas.ru
Хаартыска: министиэристибэ пресс-сулууспатыттан